Eva Sóley frænka mín á afmæli í dag, til hamingju með 8 ára afmælið elsku Eva mín.
Annars er nú allt voðalega rólegt hjá okkur núna. Árni fór í eina prófið sitt á þessari önn í morgun og núna eru bara verkefni eftir hjá honum.
Ég er bara á fullu í heimaprófinu mínu og á að skila því núna á fimmtudaginn. Í heimaprófinu eigum við að setja okkur í spor skólasálfræðings sem fær inn á borð til sín vandamál varðandi hana Idu. Við fáum svo lýsingu með bæði frá kennurum og foreldrum um hvað þeim finnst vera að og út frá því eigum við að mynda okkur skoðun á því hvernig við myndum reyna að laga þetta vandamál. Bara frekar gaman að pæla í þessu.

Jæja Eurovision búið þetta árið. Vinningslagið var svona lala að mínu mati. Ég vildi svo innilega að Noregur myndi vinna, alveg frábært lag hjá þeim :).
En tókuð þið samt eftir því að þau 4 lönd sem eru alltaf örugg inn, þ.e.a.s Spánn, England, Þýskaland og Frakkland röðuðu sér í neðstu sætin?? Hmmm, af hverju eiga þau ekki að þurfa að taka þátt í forkeppninni, finnst þetta svo hallærislegar reglur að þau séu alltaf sjálfkrafa inni í aðalkeppninni.

Er bara frekar sár að við komumst ekki áfram :(. Mér fundust ömurlegt lög komast áfram eins og Króatía, Sviss og Ungverjaland. En mjög gaman hinsvegar að bæði Noregur og Danmörk komust áfram, stóðu sig mjög vel.
Kenni reyndar Árna um að Króatía komst áfram, hann kaus þá nefnilega óvart ;), mjög vinsælt sko. Alveg hægt að ímynda sér að það munaði bara einu atkvæði, tíhí.

Alltaf styttist í Eurovision! Er einmitt að hlusta núna á gömul Eurovisionlög - eins og Diggi Loo Diggi Ley og Nína - þvílíkt stuð.
Annars hlýtur Selma að komast áfram í kvöld. Ég er samt eiginlega ekkert búin að hugsa um þann möguleika á því að við komumst ekki áfram. Maður verður auðvitað að halda í íslensku hefðina og halda að við vinnum!! Og hafa áhyggjur af því að við höfum ekki efni á því að halda keppnina, haha. En allavega, skemmtið ykkur vel í kvöld :), veit að ég geri það.

Jæja, þá fæ ég heimaprófið mitt á morgun. Hlakka nú ekkert voðalega til þess en vonandi gengur þetta allt. Ég sat einmitt út í glugga (glugginn opnast semsagt alveg upp á gátt og er svona 1 meter á hæð) í gær og var að læra í sólinni, voða þægilegt.
Svo styttist alltaf í Eurovision, hlakka ekkert smá til. Ég fylgist einmitt alltaf með blogginu frá Kænugarði, alveg frábært að lesa það sem Gísli Marteinn skrifar. Svo þurfti auðvitað að minna mig á það að við getum kosið Ísland í keppninni, mjög gott :).
Við náðum í bíómiðana fyrir Star Wars í fyrradag, vei vei. Svo er ein stöðin hérna að sýna allar hinar myndirnar núna um hvítasunnuhelgina, voða næs. Mynd nr. II verður einmitt sýnd í kvöld, gott að geta horft á hana og rifjað aðeins upp það sem er búið að gerast.
Hrönn og Axel áttu eins árs brúðkapsafmæli í gær, mér finnst svo stutt síðan að þau giftu sig :). Til hamingju krúsurnar mínar. Sem þýðir líka að bráðum er komið eitt ár síðan að við fórum til Flórida, væri sko alveg til í að fara til Bandaríkjanna aftur og versla. En það verður víst aðeins að bíða, þá verður bara skemmtilegra þegar að maður fer næst.

Það er búið að vera æðislegt veður hérna í Árósum, bæði í dag og í gær, heiðskírt og þvílíkt heitt. Ég ákvað einmitt að skella mér aðeins í skólann í dag og hitta sálfræðinemana í hádegismat, það var voða næs að komast aðeins út og spjalla. Svo fórum við aðeins upp á þak og vorum þar í sólbaði :).
Svo er planið að fara út að borða með sálfræðinemunum 2. júní (sama dag og við eigum að skila ritgerðunum), það verður örugglega rosa gaman. Enda á ég ekkert eftir að hitta fólkið aftur fyrr en einhvern tímann í nóvember.

Ummm, ég elska lyktina af nýslegnu grasi :).

Það er nú bara ekkert að gerast hjá okkur hjónunum þessa dagana, erum heima að læra og förum varla út úr húsi. Enda eru bara 6 dagar þangað til að heimaprófið byrjar.
Annars er ég búin að setja inn niðurtalningar hérna til hægri (þær halda í mér lífinu þessa dagana), get varla beðið eftir að skólinn verði búinn.
En svo verður nú smá gaman þarnæstu helgi, Eurovision auðvitað bæði 19. og 21. maí og svo ætlum við að skella okkur á Star Wars 20. maí. Reyndar verð ég í heimaprófinu alla þessa daga en það hlýtur að reddast.

Ríta Margit frænka mín á 5 ára afmæli í dag, til hamingju með afmælið elsku Ríta mín. Oh hvað ég væri til í að komast í afmælið til hennar á laugardaginn. Bjarklind systir (mamma hennar Rítu) gerir nefnilega bestu ostaköku í heimi, nammi namm. Svo er bara líka svo langt síðan að ég fór í barnaafmæli og gat hitt alla fjölskylduna. Ég á semsagt 9 frændsystkini en ég er bara búin að komast í eitt afmæli síðan í ágúst, ekki alveg að fíla það.

Það eru tveir sem eiga afmæli í dag :). Grétar baunabúi og Ingibjörg vinkona, innilega til hamingju með daginn bæði tvö. Vona að dagurinn verði góður hjá ykkur.
Annars er fyrirlesturinn minn búinn og hann gekk bara rosa vel. Var reyndar frekar stressuð og stelpurnar sögðu að ég hefði talað rosa hratt en það skildist allt sem betur fer.
Svo er ég alveg að verða búin með ritgerðina í Vinnusálfræði mína og ég er ekkert smá ánægð með það því að ég er alveg að mygla yfir þessum ritgerðum. Á samt aðeins eftir að laga ritgerðina fyrir Átraskanir.
En svo á morgun er seinasti fyrirlesturinn minn í sálfræðináminu, vei vei :).

Pabbi minn á afmæli í dag, til hamingju með afmælið elsku pabbi minn. Vildi að ég væri á landinu svo að ég gæti komið kaffiboðið sem á að vera í kvöld en það verður víst að bíða aðeins.
Annars er nú voðalega lítið að frétta, ég er á fullu að gera fyrirlesturinn minn í Átröskunum en ég á að flytja hann núna á föstudaginn og ég kvíði nú dálítið fyrir. Hlakka líka til þegar að hann verður búinn :).
Svo í dag eru 2 kennsludagar eftir, á föstudaginn og næsta miðvikudag, jibbí.

Við erum búin að panta flugfar heim :). Lendum á Keflavíkuflugvelli þann 26. júní á miðnætti, Árni flýgur svo aftur til Árósa 24. ágúst :( en svo flýg ég aftur út 29. október og planið er að vera hérna í 3 vikur, bæði til að vera eitthvað með Árnanum mínum og líka að finna mér leiðbeinanda fyrir mastersritgerðina.

Jæja, þá er sumardagurinn fyrsti kominn á Íslandi :). Gleðilegt sumar allir. Ég man þegar að ég var að spila með Lúðrasveitinni að þá var alltaf kalt og rigning á þessum degi, það var semsagt ekkert voðalega gaman að spila í skrúðgöngunni. En samt gaman að hugsa til þess eftir á.
Annars er nú loksins komið á hreint hvenær Árni er búinn í skólanum sínum. Hann verður semsagt búinn 2. júní, alveg eins og ég. Gæti ekki verið betra. Við ætlum að taka bílinn 3. júní og leggja bara strax af stað í reisuna okkar. Þetta verður ógó gaman.
Svo er nokkurskonar saumó í sálfræðinni í kvöld, alltaf gaman að hitta stelpurnar :).
En jæja, ætli ég verði ekki að halda áfram að skrifa þessa blessuðu ritgerð mína, ég er alveg komin með upp í kok af henni en takmarkið er að klára hana nokkurn veginn fyrir 4. maí.

Við fórum til Karenar og Grétars í gær, alltaf gaman að hitta þau :). Nóg af nammi og snakki og við spjölluðum rosa mikið enda frekar langt síðan að við hittumst. Svo var tekið eitt Friends spil. Eftir smá stund var ég greinilega byrjuð að lifa mig aðeins of mikið inn í spilið vegna þess að ég kallaði Grétar Chandler :). En allavega, alltaf gaman að spila þetta spil.
Svo ætla þau skötuhjú að koma til okkar á eftir og við ætlum að panta okkur pizzu, nammi namm. Fyrst að maður borðaði svona mikið í gær er alveg jafn gott að halda því áfram.

Ég sá á einu bloggi eina sem var að auglýsa eftir einbeitingu og ég ákvað bara að gera slíkt hið sama :). Endilega semsagt að senda mér einbeitingu, ég er búin að vera svo ódugleg við að skrifa undanfarna daga.
En annars verður þetta smá niðurtalningarblogg enda er ég búin að vera að dunda mér við það þegar að ég á að vera að læra, rosa sniðug ;). Það eru semsagt 19 dagar þangað til kennsla er búin, 32 dagar þangað til að heimaprófið í Skólasálfræði byrjar og 48 dagar þangað til að skólinn er búinn í sumar :). Hlakka svooo mikið til, get varla beðið.

Alveg ennþá minna að gerast hjá okkur núna heldur en seinast þegar að ég bloggaði og ég hélt sko að það væri ekki hægt :).
Ég er loksins búin að fá svar frá kennaranum mínum í Vinnuálfræði og hann er búinn að samþykkja ritgerðarefnið mitt. Mjög ánægð með það, sérstaklega þar sem að hann svaraði mér aðeins eftir 2 vikna bið. Þannig að núna get ég byrjað að skrifa á fullu.
En annars er semsagt voðalega lítið að frétta. Ef maður fer ekki í skólann er maður bara heima og skrifa ritgerð, allt rosa spennandi. Öfunda einmitt Helgu og Frey af því að vera að fara til New York á föstudaginn. Skemmtið ykkur rosa vel krúttin mín og njótið þess að slappa smá af, þið eigið það svo mikið skilið :).
Svo er ég reyndar að fara að flytja fyrirlestur þann 29. apríl í Átröskunum, kvíði nú dálítið fyrir því. Það er nú ekki mín besta hlið að flytja svona fyrirlestur, verð svo þvílíkt stressuð að þurfa að tala fyrir framan fólk. En það er bara gott að fá smá æfingu í þessu.

Alveg ekkert að gerast hjá okkur þessa dagana, samanber bloggið hjá Árna :). Ég er bara á fullu að skrifa ritgerðina mína og Árni er nýbyrjaður aftur í skólanum eftir 3 vikna frí. Ég er hinsvegar dálítið spennt að vita hvenær hann er búinn í prófum (til þess að geta planað sumarið) en Danirnir eru ekkert að flýta sér í þessum málum. Allavega ekki í deildinni hans, ég vissi hvenær skólinn myndi klárast hjá mér í vor áður en vorönnin byrjaði ;).
Annars er ég eitthvað slöpp þessa dagana, með þvílíkan hausverk, flökurt og bara almennan slappleika. Vona að ég nái þessu úr mér, hef ekki tíma til þess að vera veik núna.
Svo er alltaf að styttast í Evrópuferðina okkar, hlakka svo mikið til þegar að skólinn verður búinn, keyra um alla Evrópu og skoða alla flottu staðina sem við ætlum að sjá.

Jæja þá erum við komin aftur til Danmerkur, skólinn byrjaður hjá mér aftur á fullu og núna þarf ég að fara að skrifa ritgerðina mína í Vinnusálfræði. Ég er loksins búin að finna mér efni og er bara að bíða eftir samþykki kennarans míns og þá get ég byrjað á því að fara að skrifa. Ritgerðin í Átröskunum gengur bara ágætlega, komin með 14 bls. og um helgina ætla ég að reyna að klára sem mest í henni og snúa mér svo algjörlega að Vinnusálfræðinni. Planið er að klára þá ritgerð í lok apríl og þá tekur bara við lestur fyrir heimapróf sem verður 17. maí.
Annars er ekkert smá gott veður hérna núna, alltaf heiðskírt og alveg þó nokkuð heitt. Við hjónin fórum einmitt niður í bæ í dag og ég keypti mér rosalega flottan teinóttan sumarjakka, vei vei.
Svo hittumst við nokkrar stelpur úr sálfræðinni í gær heima hjá Regínu. Alltaf gaman að hitta þær, enda mikið hlegið, spjallað og borðað :).
En jæja, best að fara að byrja á þvílíka skemmtilega föstudagskvöldinu, kvöldinu verður nefnilega eytt í að lesa yfir heimildir, jibbí. Góða helgi allir saman.

Gleðilega páska allir saman :).
Það er nú frekar langt síðan að ég hef skrifað hérna inn en það er bara búið að vera svoooo gaman hérna á Íslandi að maður hefur nú látið bloggið aðeins sitja á hakanum :). Ég er bara ekki alveg að trúa því að við séum að fara til Danmerkur á morgun því að tíminn hefur verið svo fljótur að líða.
Annars hlakka ég nú til eins og það er að fá ný gler í gleraugun mín og það gerist einmitt á morgun í flugstöðinni. Sjónin er nefnilega búin að versna um einn heilan á öðru auganum (það er ekki von að mér fannst ég vera byrjuð að sjá illa) þannig að núna er ég komin með -6,25 á hægra auga sem er frekar mikið. En semsagt um sexleytið á morgun sé ég aftur vel :).
Annars er nú bara búið að vera stíf dagskrá síðan að við komum til þess að ná því að hitta alla en maður bjóst svo sem við því. Bara frábært að geta aðeins komist heim og stytt tímann aðeins úti.

Við erum á leiðinni heim í páskafrí :). Ákváðum semsagt í gær að kaupa okkur miða og við lendum á morgun kl. 22:30 og fljúgum til Danmerkur aftur um morguninn þann 29. Árna langaði eitthvað svo heim í gær vegna þess að hann er kominn í þriggja vikna frí og hefur ekkert að gera og það þarf nú ekki að biðja mig tvisvar um að fara heim. Jej jej jej, ég hlakka ekkert smá til að knúsa Snúðinn minn, fjölskyldu og vini :).

Í gær var ég næstum því búin að panta flug heim fyrir okkur frá 16. mars - 29. mars en Árni tók upp á því að vera eitthvað voðalega skynsamur og fékk mig ofan af því að fara. Betra að eiga peningana í Evrópuferðinni okkar :(. Hann vildi ekki einu sinni gefa sig þegar að ég sagði honum að þá gæti hann fengið sér eins marga þrista og hann gæti torgað. En oh, hvað mig langar að fara.
Ég var svo líka nærri því búin að panta páskaegg á nammi.is en þar sem að eitt páskaegg nr. 5 frá Nóa - Síríus kostar 3.990 með sendingarkostnaði vorum við ekki alveg tilbúin til þess :(.
En mig langar svoooo mikið í páskaegg. Ef að foreldrar okkar senda okkur ekki páskaegg "hint hint" þá er Karen búin að bjóðast til þess að kaupa páskaegg þegar að þau eru heima um páskana og koma með það til okkar, ekkert smá góð :).
Annars erum við búin að breyta einu varðandi Evrópuferðina, ætlum að fara að skoða Róm líka en á móti kemur að þá verðum við styttra í Mílanó. En það er allt í lagi, okkur langar mikið meira að fara til Rómar :).

Ákvað að taka eitt próf og ég er Bree í Desperative Housewifes :) sem er by the way frábær þáttaröð.
Og þetta er það sem er sagt um Bree: You´re the perfect wife, mother and housekeeper, and just a bit of a control freak. Everyone admires you, but maybe they´re just a little bit afraid of you. Step away from the souffle, ease up on the hairspray and learn to go with the flow.

Varð bara að segja frá einni æðislegustu mynd sem ég hef séð lengi. Ég og Árni tókum semsagt The Notebook og hún er ekkert smá góð. Reyndar alveg ekta stelpumynd enda held ég að ég hafi aldreið grátið svona mikið yfir einni mynd :).

Eitthvað voðalega lítið að gerast hjá mér þessa dagana. Kannski ekki skrýtið vegna þess að ég er bara 2 daga í skólanum í hverri viku og Árni er búin að vera rosalega upptekin í verkefnavinnu þannig að ég er mestmegnis ein heima :(.
Annars er ég loksin byrjuð að annarri af ritgerðunum sem ég á að skila á þessari önn. Þarf semsagt að skila 2 ritgerðum sem eru ca. 20 bls. og svo fer ég í eitt heimapróf í maí. Þannig að planið er að klára aðra ritgerðina í núna mars og hina ritgerðina í apríl og nota svo fyrri hluta maí til að læra fyrir heimaprófið, sjáum til hvernig það gengur.
Annars langar mig alveg rosalega mikið heim núna. Sakna fjölskyldunnar, vinanna og auðvitað Snúðsins okkars. Ef Árninn minn væri ekki hérna með mér þá hefði ég líklegast ekkert komið aftur eftir áramót. Alveg er það pottþétt að mig langar alls ekki að búa annars staðar en á Íslandi og þótt að við séum bara tímabundið hérna í Danmörku þá get ég ekki beðið eftir að flytja alfarin heim í sumar.

Fannst þetta svo meiriháttar að ég varð að skella þessu inn :)

Ert þú að velta því fyrir þér hvort þú sért tilbúin(n) til að eignast barn? Þá ættirðu kannski að taka þetta próf fyrst!

Fituprófið

Smurðu hnetusmjöri á sófann og aðeins upp á gardínurnar. Settu nokkrar kjötbollur á bak við sófann og láttu þær vera þar yfir sumarið.

Leikfangaprófið

Náðu í kassa með 25 kílóum af Legó-kubbum. Fáðu vin þinn til að dreifa vel úr kubbunum á gólfið í íbúðinni. Láttu binda fyrir augun á þér. Reyndu svo að fara frá svefnherberginu og inn í eldhús og aftur til baka. Það er bannað að vera í skóm og alveg bannað að æpa því það getur vakið barnið um nætur.

Stórmarkaðsprófið

Fáðu lánað eitt dýr af millistærð (t.d. geit) og farðu með hana í næsta stórmarkað að versla. Hafðu auga með geitinni allan tímann og borgaðu fyrir allt sem hún étur eða eyðileggur.

Fataprófið

Hefurðu prófað að klæða tveggja ára gamalt barn í föt? Fáðu þér stóran, lifandi og spriklandi kolkrabba. Troddu honum í lítið innkaupanet og passaðu að hafa alla armana inni í pokanum.

Matarprófið

Kauptu þér stóra plastkönnu. Fylltu hana til hálfs með vatni og hengdu hana svo upp í loftið í snúru. Láttu könnuna sveiflast til og frá eins og pendúl. Reyndu nú að koma einni matskeið af hafragraut niður um stútinn á könnunni um leið og þú leikur flugvél með skeiðinni. Helltu svo öllu innihaldinu á gólfið.

Næturprófið

Saumaðu þér lítinn poka úr sterku efni og fylltu hann með 4-5 kílóum af sandi. Klukkan 15 tekur þú pokann upp og byrjar að ganga um gólf með hann um leið og þú raular. Þessu heldur þú áfram til kl. 21. Leggðu þá pokann frá þér og stilltu vekjaraklukkuna á 22. Þá þarftu að vakna, ná í sandpokann og syngja öll þau lög sem þú hefur mögulega heyrt um ævina. Semdu svo 10-12 ný lög og syngdu þau til kl. 4 um morguninn á meðan þú gengur um gólf með pokann. Stilltu vekjaraklukkuna á 5. Vaknaðu og taktu til morgunmat. Gerðu þetta alltaf 5 daga í röð og líttu glaðlega út!

Sköpunargáfuprófið

Fáðu þér eggjabakka. Búðu til krókódíl úr honum með aðstoð skæra og málningar. Fáðu þér svo tóma klósettrúllu og búðu til fallegt jólaljós úr henni. Þú mátt aðeins nota límband og álpappír. Að lokum skaltu fá þér tóma mjólkurfernu, borðtennisbolta og tóman Kornflakes-pakka. Búðu til alvöru eftirlíkingu af Eiffel-turninum.

Bílprófið

Gleymdu því að fá þér BMW og fáðu þér station-bíl (þið vitið þessi löngu að aftan til að geyma vagna, kerrur og alls konar fylgihluti!) Kauptu þér súkkulaðiís í brauði og settu hann í hanskahólfið. Láttu hann vera þar. Finndu krónu. Settu hana inn í geislaspilarann í bílnum. Fáðu þér stóran pakka af kexkökum og myldu þær allar í aftursætið.... Nú er bíllinn tilbúinn!

Þolpróf kvenna

Fáðu lánaðan stóran grjónapúða og festu hann framan á magann á þér. Þú getur notað öryggisnælur og nælt pokann í fötin þín. Hafðu pokann framan á þér í 9 mánuði. Að þeim tíma liðnum geturðu fjarlægt 1/10 af innihaldi pokans - 9/10 verða eftir.

Þolpróf karla

Farðu inn í næsta apótek. Settu seðlaveskið þitt opið á borðið og segðu apótekaranum að taka eins og hann vill. Farðu nú í næsta stórmarkað. Farðu inn á skrifstofu og gerðu samning við eigandann um að launin þín verði lögð inn á reikning búðarinnar um hver mánaðamót. Kauptu þér dagblað. Farðu með það heim og lestu það í ró og næði. Í síðasta sinn!

Lokaprófið

Komdu þér í samband við par sem á barn. Útskýrðu fyrir þeim hvernig þau geta bætt sig í agamálum, þolgæðum, þolinmæði, klósettþjálfun og borðsiðum barnsins. Leggðu áherslu á að þau megi aldrei láta barnið sitt hlaupa um eftirlitslaust. Njóttu kvöldsins, því þú munt aldrei aftur hafa rétt svör við öllu.

Ert þú tilbúin(n) til að eignast barn?

En svo þegar að maður horfir á þessu litlu kríli og alveg sama hvað þau hafa gert af sér þá bráðnar maður alveg ;).

Það er alveg merkilegt hvað það er búið að snjóa mikið hérna í Danmörku. Maður hefur verið að heyra í Íslendingum sem hafa búið hérna í nokkur ár og þeir hafa bara aldrei séð svona mikinn snjó hérna.
Einmitt þegar að mamma og pabbi ákveða að koma í heimsókn kemur snjórinn. Mamma var nú alveg hrikalega sátt við það (eða ekki) en svo þegar að þau fóru til Köln fór að hlýna og snjórinn að hverfa. Þau keyrðu svo frá Köln til Kaupmannahafnar í gær og voru tæpan sólarhring á leiðinni (tekur um svona 10 tíma vanalega). Það var semsagt frekar mikill vindur og snjókoma í gær og þau sátu föst á þjóðveginum í 10 tíma!! Enda kunna Danir ekkert að keyra í snjór, það voru flutningabílar fastir þvers og krus á veginum. Ekki mjög góður endir á ferðalaginu þeirra. Þau hringdu í mig klukkan 10 og þá voru þau loksins komin á flugvöllinn (áttu flug kl. 12) og voru gjörsamlega að deyja úr þreytu enda gátu þau lítið sem ekkert sofið í bílnum. Og ef þau hefðu komið mikið seinna á flugvöllinn hefðu þau misst af flugvélinni. Æ ég vorkenndi þeim svo mikið. En þau geta nú hvílt sig í flugvélinni og þegar að þau koma heim.
Svo kemst Snúður loksins heim úr Kattholti í dag. Sigga systir ætlar að sækja hann svo að hann þurfi ekki að vera einn aukadag þar (mamma og pabbi geta auðvitað ekkert náð í hann í dag). Oh hvað maður verður ánægður að koma heim.

Það var mjög gaman í stelpudjamminu á föstudaginn, fámennt en góðmennt. Ég og Helga Björt (gestgjafinn) vorum semsagt saman í eitt ár í Flensborg, gaman að sjá hana aftur. Svo var líka ein dönsk stelpa þarna þannig að maður æfðist aðeins í dönskunni :). Skrýtið hvað er auðveldara að tala dönsku eftir að maður er búin að fá sér í glas.
Svo var nú bara slappað af og lesið um helgina. Var nefnilega að kaupa mér nýja bók eftir Noru Roberts og er alveg sokkin ofan í hana. Karen og Grétar komu óvænt til okkar á sunnudaginn með bakkelsi (í tilefni konudagsins). Ekkert smá sætt af þeim. Svo fékk ég líka púsl frá Árna í konudagsgjöf, rosa gaman.
Ég og Árni erum loksins búin að ákveða hvaða borgir við ætlum að heimsækja í Evrópuferðinni okkar. Okkur langar semsagt að sjá þessar borgir (og ætlum að keyra um þær í þessari röð): Berlín, Prag, Vín, Feneyjar, Mílanó, Bern, París, Brussel og Amsterdam. Þvílíkt stuð. Ég hlakka ekkert smá til að fara.

Jæja, þá eru foreldarnir farnir :(. Þau fóru í dag, ákváðu að vera einn dag lengur hjá okkur en koma þá ekki til okkar aftur þegar að þau eru búin að vera í Þýskalandi. En það var ekkert smá gaman að hafa þau. Ég sýndi þeim allt það helsta hérna í Århus og þau buðu okkur út að borða á XL þar sem að við fengum m.a.s. kengúrukjöt!! sem er bara mjög gott, kom mér dálítið á óvart. Svo komu þau líka með fullt af íslensku nammi og ég og Árni erum búin að vera að rífast um hver á að fá hvað :).
Svo þegar að þau náðu í bílaleigubílinn í gær þá dró ég þau í Bilka (risastór búð hérna) til þess að njóta þess að versla mikið. Við getum nefnilega alltaf bara verslað fyrir tvo daga í einu eða eitthvað (takmarkast við hvað við getum borið á hjólunum). En núna gat ég verslað alveg fullt í einu, rosa gaman.
En svo var voða skrýtið að kveðja þau í morgun, ég var einhvern veginn ekkert að ná því að þau voru að fara en núna er allt svo tómlegt.
Svo er ég að fara í stelpupartý í kvöld með Karen, það verður örugglega rosa gaman. Ég kannast sem betur fer aðeins við gestgjafann en þekki örugglega enga aðra :) en það er bara gaman.
Góða helgi allir saman og verið góð hvort við annað.

Helgin var bara mjög fín. Það var ekkert mál fyrir Karen og Grétar að komast til okkar en þau komust svo varla inn fyrir dyrnar af því að það fennti alveg upp á miðja hurð hjá okkur :). Lögin í forkeppninni voru nú samt öll frekar léleg fyrir utan 2-3. Ég og Karen vildum að lagið Jeg tænder på dig myndi vinna enda var það flottasta lagið að okkar mati og það lag vann, jej.
En vá hvað við borðuðum mikið yfir keppninni. Ég og Árni vorum ekkert smá dugleg að buðum upp á hollustusnakk, vínber og niðurskornar gulrætur og gúrkur en þá komu Karen og Grétar með nammi og snakk með sér líka þannig að við borðuðum örugglega stanslaust í tvo tíma.
Svo á Ásta vinkona afmæli í dag. Til hamingju með afmælið elsku Ásta mín. (Sniðugt að heita Ástríður og eiga afmæli á Valentínusardag). Svo heldur þú bara afmælispartý þegar að við komum heim, hvað segirðu um það :).
Svo koma mamma og pabbi í dag. Fer niður á lestarstöð um 4 leytið til að sækja þau, get varla beðið eftir að knúsa þau.

Vá hvað það snjóar mikið hérna í Århus, alveg ekta snjóbylur bara. Ég þurfti að fara út í búð og ákvað bara að labba (var ekki alveg að treysta mér að hjóla í öllum þessum snjó) og ég leit út eins og snjókarl þegar að ég kom í búðina. En samt fínt að komast aðeins út, þegar að maður er svona lítið í skólanum þá er eitthvað svo auðvelt að nenna ekki út þannig að það var fínt að drífa sig aðeins upp af rassinum.
Við buðum Karen og Grétari í brunch í gærmorgun og ég held bara að þeim hafi þótt það rosalega gott :). Við gerðum eggjahræru, bacon, amerískar pönnukökur, bananasalat, ristað brauð og kartöflubáta, nammi namm.
Svo ætla þau að koma til okkar aftur í kvöld að horfa á dönsku forkeppnina í Eurovision. Bæði það að þau eru á bíl þessa dagana (þannig að þau þurfa ekki að hjóla í þessu veðri) og við eigum stærri sófa en þau.
Árni og Grétar voru að kaupa sér kort í skvass. Rosa gott hjá þeim en þeir eru svo ruglaðir stundum. Byrjuðu á því að fara nærri því í tvöfaldan tíma fyrst og fóru svo strax daginn eftir. Árni getur varla hreyft sig, hann er með svo miklar harðsperrur.
Svo er alltaf að styttast í mömmu og pabba. Hlakka rosa til að sjá þau en ég á eftir að hafa svo miklar áhyggjur af Snúðalíus, hann verður semsagt í Kattholti í 10 daga. Ekki alveg uppáhaldið hans, hann kemst ekki út þegar að hann vill og þarf að vera í búri einhvern hluta af deginum og svona. Litla grey. En allavega betra að hafa hann þarna frekar en að hann sé einn heima og einhver kemur tvisvar á dag að líta til með honum og gefa honum. Þá fengi hann ekkert að fara út. Svo er líka bara fínt að styrkja Kattholt.

Helgin var mjög fín hjá okkur. Tengdó + Maggi og Fjóla (systir hennar Ingibjargar og maðurinn hennar) komu til okkar á laugardagskvöldið og við fórum út að borða á Athenu. Mjög góður matur þar sem Árni fékk sér sverðfisk sem smakkast alveg ekki eins og fiskur. Frekar bara eins og kjöt, rosalega þéttur í sér. Svo eftir matinn fórum við aftur heim og spjölluðum aðeins saman. Það var ekkert smá gaman að sjá þau (þótt stutt hafi verið). Svo fengum við líka íslenskt nammi, jej.
Svo koma mamma og pabbi næsta mánudag. Get varla beðið eftir að sjá þau. Þau gista hjá okkur líklegast í 3 nætur en ætla svo að keyra til Þýskalands. Svo koma þau aftur til okkar í bakaleiðinni, ekkert smá gaman. Ég er einmitt að reyna að skipuleggja hvað á að gera alla dagana, ógó gaman.
En fyrst Laufey er búin að upplýsa að þau eiga von á barni þá get ég líklegast talað um það líka :). Árni er semsagt að fá litla frænku í heiminn í byrjun júlí. Ekkert smá yndislegt. Vonandi verðum við komin heim áður en hún fæðist en annars komum við í seinasta lagi heim um miðjan júlí (fer eftir því hvenær prófin klárast hjá Árna). Ætlum semsagt að vera ca. 2 vikur í Evrópuferðinni okkar. Þar sem að ég klára skólann 2. júní þá er ég að vona að Árni verði líka búinn frekar snemma en próftaflan hans getur verið frá 30. maí - 30. júní. Ég veit ekki hvað ég myndi gera við sjálfa mig ef hann verður í prófum til seinasta dags. Þá verð ég semsagt að dúlla mér ein í 28 daga, frekar ömurlegt. Sérstaklega þar sem að Árni er búinn að segja mér að ég megi ekki vera mikið heima meðan hann er í prófum :). En þetta eru allt seinni tíma vandamál, þurfti bara smá að pústa :).

Ég og Árni áttum 5 ára afmæli í gær :) Ekkert smá gaman, minns fékk blóm og svona skemmtilegt. Svo fórum við út að borða og höfðum það bara næs í gær. Þessi 5 ára hafa samt liðið svooo hratt, mér finnst svo innilega ekki vera 5 ár síðan að við byrjuðum saman. Svo eigum við hálfs árs brúðkaupsafmæli 7. feb. Ekki það að við höldum eitthvað upp á þann dag, bara skemmtilegt.
En annars er nú voðalega lítið að frétta, er ekkert meira búin að fara í skólann og er bara búin að vera heima og horfa á sjónvarpið, er ekki alveg komin í lærugírinn ennþá :).

Jæja, byrjuð í skólanum aftur. Fór semsagt í fyrsta tímann í Vinnusálfræði í dag og skildi nákvæmlega ekki neitt!! Kannski ekki skrýtið þar sem að maður er ekkert búinn að vera að tala dönsku eða vera innan um Dani í meira en mánuð. Vonandi kemur þetta bara fljótlega. Svo fer ég aftur í skólann á morgun og þá er skólavikan mín búin :) Er bara tvo daga í skólanum og er samt í 150% námi. Frekar fyndið sko.
Íbúðin okkar er orðin rosalega fín núna, búin að hengja upp myndir, kryddhillu, hillu og spegil. Geðveikt flott.
Svo eru tengdó að koma í mjög stutta heimsókn næstu helgi. Þau fljúga beint til Aarhus en gista reyndar í Silkeborg (vegna þess að þau eru að fara á einhverja sýningu þar) þannig að við hittum þau bara um kvöldin. Allavega laugardagskvöld og vonandi líka á sunnudagskvöldið.
Í gær fórum við og hittum Karen og Grétar á Pizza Hut, nammi namm. Svo var farið heim til þeirra og Friends spilið spilað. Þvílíkt skemmtilegt spil sem endaði með jafntefli á milli okkar allra :). Takk fyrir okkur, þetta var ekkert smá gaman.

Þá er mín búin að ná öllum fögum á haustönnninni, er mjög sátt við það.
Það er samt voðalega skrýtið kerfi hérna í Árósum. Ég fékk bara að vita í gær að ég ætti að mæta kl. 10 niður í skóla til að hitta einn kennara og hann gaf mér feedback á það sem mætti betur fara í ritgerðinni og svona. Voða þægilegt, þá veit maður að hverju maður á að einbeita sér að næst. Ég fékk semsagt 8 (á 13-punkta skala), er svona lala sátt við það. Ætli það sé ekki svona ca. 7 á íslenskum kvarða. Hefði nú alveg viljað meira samt. En vonandi fær maður hærra næst.

Vá hvað ég var spennt í dag. Ég hlustaði á landsleikinn í gegnum netið og ég var að deyja á seinustu mínútum leiksins, barði í sófann og ég veit ekki hvað :). Strákarnir stóðu sig ekkert smá vel. Vonandi ná þeir bara að halda í við Slóvena á þriðjudaginn.
Annars er ég bara búin að vera að knúsa manninn minn og slappa af síðan að ég kom aftur. Ekki það að ég náði ekki að slappa vel af hjá mömmu og pabba enda var dekrað við mann alla dagana :). Ég fékk uppáhaldsmatana mína, nammi namm og bara að búa hjá þeim í 3 vikur var frábært. Takk aftur fyrir mig elsku mamma og pabbi. Það sakaði heldur ekki að hafa Snúð uppí hjá sér á hverri nóttu.
Svo byrjar skólinn aftur hjá Árna á morgun, þetta er nú voðalega skrýtið kerfi hjá þeim í tölvunarfræðideildinni. Seinasti prófdagur var á föstudag og kennsla byrjar strax eftir helgi. Ekkert frí, meðan að t.d. sálfræðideildin fær frí í alveg 10 daga, skil þetta ekki alveg sko.

Jæja þá er ég komin aftur til Danmerkur. Ég svaf nú lítið í nótt enda frekar stressuð fyrir flugið og ég var nú dálítið lítil í mér þegar að ég var að kveðja mömmu og pabba á flugvellinum.
Það var hinsvegar mjög þægilegt að fljúga á Saga Class. Margrét Frímannsdóttir sat við hliðina á mér og við erum báðar jafn flughræddar. Enda greip ég í hendina á henni í flugtakinu :) en henni fannst það allt í lagi. Svo var hægt að velja um alveg þrjá rétti í morgunmat en af því að ég er alltaf svo lystarlaus í flugvélum þá fékk ég mér ekki neitt (það var hægt að fá bacon og egg, fyllta pönnuköku og eggjahræru, ekkert smá girnilegt sko en maginn neitar bara að taka við þessu).
Flugið gekk annars bara vel, var eins og ég segi dálítið hrædd í flugtakinu sjálfu en allt annað gekk vel. Svo tók ég bara lestina til Aarhus þar sem að sætasti strákurinn tók á móti mér með pússluspil :) (og hann fékk líka afmælisgjafir). Jei, gaman gaman. Það var ekkert smá gott að sjá Árnann minn aftur og knúsa hann.
En svo er ég bara í fríi þangað til 1. febrúar. Árni byrjar hinsvegar í skólanum núna á mánudaginn, ekkert frí fyrir hann.

Ég er nú búin að vera eitthvað voðalega löt að blogga. Ástæðan fyrir því að það er eiginlega ekkert að gerast í lífinu mína þessa dagana. Jú ég er búin að vera rosalega dugleg að hitta vinina og svona á kvöldin en á daginn sef ég bara og er þar af leiðandi algjörlega búin að snúa sólarhringnum við, ekki gott.
Sálfræðingurinn minn (ég fór til hans vegna flughræðslunnar minnar) bað mig að halda dagbók þar sem að ég skrifa hvað ég er að gera á hverjum klukkutíma og þegar að ég skilaði inn þessari dagbók þá fékk hann alveg áfall við það hvað ég sef mikið :). Ég var nú reyndar fljót að taka fram að þetta er ekki mitt eiginlega svefnmynstur.
En svo er ég að fara að fljúga til Danmerkur ekki á morgun heldur hinn. Ég hlakka bæði til og kvíði fyrir. Hlakka auðvitað til að sjá Árnann minn eftir 20 daga fjarveru og hitta vini aftur og svona. En kvíði líka rosalega fyrir því að fljúga ein. Reyndar ætla ég að fljúga á Saga Class (kostaði bara 9.500 punkta) þannig að það á alveg að fara vel um mig. Þetta hlýtur allt að ganga.
Svo er ég líklegast búin að vera of lengi á Íslandi, var að hitta nokkrar vinkonur í hádegismat og ein gleymdi að koma og kveðja mig :) nefni engin nöfn samt tíhí. Ekki það að ég sé sár, fannst þetta geðveikt fyndið bara.
En annars, þeir sem vilja koma og kveðja mig þá megið þið koma til mömmu og pabba annað kvöld um níuleytið.

Ástin mín á afmæli í dag. Til hamingju með afmælið elsku Árni minn. Vildi svo innilega að ég væri hjá þér til að knúsa þig en við sjáumst eftir 8 daga og þá skal ég stjana alveg svakalega mikið við þig :).
Mér finnst nú dálítið skrýtið að vera ekki hjá honum á afmælisdaginn, sérstaklega þar sem að hann verður bara einn í allan dag. En Karen og Grétar ætla að bjóða honum til sín annað kvöld þannig að þá fær hann loksins að hitta einhverja, greyið hann er svo einmana. En svo fær hann fullt af pökkum þegar að ég kem til hans, vei vei!

Búin að vera heima hjá mömmu og pabba í viku núna og það er ekkert smá gott. Snúður sefur alltaf upp í hjá mér og vekur mann svona 4 sinnum á hverri nóttu, mjög vinsæll :). Annars er Snúður eitthvað haltur á öðrum framfætinum núna, greyið manns. Hann sefur bara allan daginn og þar sem að það er helgi þá er ekkert hægt að fara með hann til dýralæknis, enda var ég búin að panta tíma í bólusetningu á mánudaginn fyrir hann. Ég verð nú ekki voðalega vinsæl á mánudaginn semsagt, fyrst þarf maður að fara í bíl og svo til dýralæknis, ekkert skemmtilegt.
Svo var smá stelpuhittingur hjá Helgu í gær, rosalega gaman. Við fórum á Hressó og líka á Glaumbar og það var ekkert smá skemmtileg tónlist á báðum stöðum, bara frábært kvöld :).
Annars á frændi minn, Daníel Þórarinn, afmæli í dag. Til hamingju með 9 ára afmælið Daníel minn. Afi minn hefði líka átt afmæli og hefði verið 92 ára í dag ef hann væri á lífi.

Nýtt ár komið, árið 2005. Árið 2004 var án efa það mikilvægasta sem ég hef lifað. Ég giftist auðvitað Árnanum mínum og það var yndislegur dagur í alla staði. Við hjónakornin útskrifuðumst bæði og fluttum til Danmerkur í meira nám. Þótt að ég sé ekkert yfir mig hrifin að vera í öðru landi þá líst mér vel á námið mitt og ætla að klára það, en kem samt örugglega fyrr heim og tek praktík og skrifa mastersritgerðina hérna heima.
Árni flaug svo til Danmerkur í morgun af því að hann er að fara í próf 3. janúar. Þetta er í fyrsta skipti sem við erum án hvors annars í meira en 3 nætur :). Frekar skrýtið sko en ég sé hann eftir 20 daga, vonum bara að þeir dagar líði hratt.
En vonandi færir árið 2005 ykkur mikla gleði :).

Þótt að klukkan sé ekki orðin 6 þá ætla ég samt að óska öllum gleðilegra jóla og farsæls komandi árs. Takk fyrir frábærar stundir á árinu sem er að líða.
Snúður tók smá forskot á pakkaopnun þegar að hann fann pakkann sinn (by the way lengst undir öllu pakkaflóðinu) og tætti hann í sig til þess að geta fengið harðfiskinn sem var í pakkanum. Algjört krútt.
Mér finnst nú reyndar mjög skrýtið að vera ekki með Árna þessi jól. Fyrstu jólin okkar gift og fyrstu jólin sem við erum ekki saman. En það verður bara að hafa það, ég hitti hann auðvitað seinna í kvöld en samt pínku leiðinlegt.

Jibbí, ég er búin að ná Vinnusálfræðikúrsinum mínum. Ég er mjög ánægð með það vegna þess að við áttum að vera að leysa ákveðið vandamál fyrir eitt fyrirtæki. Það var í raun ekkert vandamál hjá þessu fyrirtæki þannig að við gátum í raun ekki leyst neitt og kennarinn sagði okkur í síðasta tímanum að við hefðum bara átt að segja við fyrirtækið að þau væru ekki með neitt vandamál þannig að þau þyrftu ekkert á okkar hjálp að halda. Við bara ha!! Þegar að maður fær úthlutað verkefni í skólanum þá klárar maður það verkefni, maður hættir ekkert við á miðri leið. En allavega, ég fékk staðið (það var aftur bara gefið staðið eða fallið).

Það er svo frábært að vera komin heim til Íslands og hitta alla. Alveg meiriháttar. Það er samt búið að vera alveg stíf dagskrá síðan við komum en það er bara gaman :).
Á laugardagskvöldið var 25 ára afmæli hjá Helgu vinkonu þar sem að maður hitti eiginlega alla vinina á einu brett, alveg yndislegt sko. Á sunnudag var 2 ára afmæli hjá Adam og þar hitti maður fjölskylduna sína :). Eftir afmælið skrifuðum við Árni á 60 jólakort, eins gott að við gerum þetta ekki á hverju ári en við erum allavega búin að senda þau öll, vei vei.
Í gær hitti ég svo nokkrar vinkonur á Tapas barnum, um nammi namm. Ekkert smá góður matur og frábær félagsskapur.
En tíminn líður bara allt of hratt, jólin eru bara alveg að koma og þá styttist í að Árni fari einn aftur til Danmerkur. Ég verð hinsvegar í mánuð til viðbótar ;).

Heimaprófið búið!! Verkefnið mitt var semsagt þetta: A discussion and comparison of Klerman & Weissman’s interpersonal psychology and Beck’s cognitive therapy as a treatment for unipolar depression.
Ég á bara eftir að prenta út lokaútgáfuna og skila því á hádegi á morgun. Árni er svo líka búinn að skila seinasta verkefninu sínu fyrir jólafrí eftir aðeins 36 tíma vöku :s. Ég gæti aldrei haldið mér vakandi svona lengi í einu.
Annars var þetta bara fínn dagur, ég og Árni kíktum niður í bæ og eigum núna bara eina jólagjöf eftir. Svo ákváðum við að splæsa á okkur LOTR: The Return of The King (extended edition). Þannig að þegar að ég verð búin að skila heimaprófinu á morgun og við verðum búin að pakka, ætlum við að horfa á myndina, ég get varla beðið sko.
Svo þurfum við bara að vakna klukkan 5:30 á laugardagsmorgun, taka strætó klukkan 6:00, lestina 7:02 og flugvélin fer klukkan 13:20. Svo lendum við í Keflavík klukkan 15:30, jibbí. Hlakka til að knúsa ykkur öll.
Við verðum bæði með sömu símanúmer og áður en við fluttum.

Jej, búin að fá að vita að ég náði próffræði áfanganum mínum. Við fáum bara staðið eða fallið þannig að ég veit í rauninni ekkert hvernig mér gekk með verkefnið mitt, bara mjög ánægð að hafa náð :).

Já gleymdi að segja eitt. Ég sakna Snúðarins okkar svooooo mikið. Ég get varla beðið eftir að sjá hann og knúsa hann. Svo er hann alltaf svo skemmtilegur um jólin, ræðst á kúlurnar á jólatrénu og veltir því næstum um koll (mamma er mjög ánægð með það, tíhí) og svo þegar að pakkarnir eru komnir undir tréð þá er sko langskemmtilegast að hoppa á þeim og leika sér að slaufunum. Alveg yndislegastur í heimi þessi kisi.

Ég er gjörsamlega að klepra á þessu heimaprófi. Ég er nokkurn veginn búin fyrir utan að ég á eftir að gera lokaorð og lesa yfir. Það sem fer í taugarnar á mér að ég hef ekki samvisku í að skila fyrir 17. des þannig að ég þarf að hanga með það yfir mér alveg þangað til. Ég er nú stundum einum of samviskusöm.
Svo fáum við hjónin í skóinn frá jólasveininum en af því að við erum orðin svo gömul þá fáum við bara annan hvorn dag, semsagt Árni byrjaði á að fá í skóinn, svo fékk ég í morgun o.s.frv. Árni fékk hrikalega sætt kisudagatal og ég fékk rosalega flottan jólasvein jej.
En svo styttist alltaf í heimkomu og ég er gjörsamlega að fara á límingunum, ég hlakka svo til. Ég kíkti einmitt til Karenar og Grétars í gær til að kveðja þau en þau fóru til Íslands í morgun. Ég hefði sko alveg verið til í að fara með þeim (þótt að það muni bara 5 dögum).
En svo ákváðum við að Árni myndi panta sér ferð aftur til Danmerkur 1. jan kl. 8:00. Þannig að hann þarf ekki að vera einn í öðru landi á gamlárskvöld, frekar lærir hann bara heima milli jóla og nýárs. Ég er auðvitað mjög ánægð með það :).

Tengdamamma mín á stórafmæli í dag en hún er fimmtug. Til hamingju með afmælið Ingibjörg mín, þú færð pakkann eftir viku :).
Annars er alveg ekkert að gerast á þessu heimili. Ég er búin að fá heimaprófið mitt og ég er bara heima að vinna það og Árni er á fullu að klára verkefni sem hann á að skila 15. des. Þannig að heimilislífið á þessum bæ er voðalega melló þessa dagana.
Annars var Árni að fá þær fréttir að fyrsta prófið hans verður á milli 3. - 6. jan. og hann lenti auðvitað í því að vera í því 3. jan. Þannig að hann verður líklegast að fara heim 30. des eða eitthvað þannig til að geta lært eitthvað (og þurfa ekki að eyða jólafríinu heima í að læra) þannig að við eyðum gamlárskvöldinu ekki saman og þar að auki í sitthvoru lagi :(. Ekki alveg nógu gaman fyrir Árnann minn.
Og svo kem ég ekkert aftur til Danmerkur fyrr en 21. jan líklegast. Þannig að hann verður aleinn í þrjár vikur :( en hann er reyndar í prófum til 20. jan þannig að ég hefði ekkert annað að gera hérna en að trufla hann (þar sem að minn skóli byrjar ekki fyrr en um miðjan febrúar og ég klára öll próf í desember).

Helga vinkona á afmæli í dag. Til hamingju með 25 ára afmælið elsku Helga mín. Það eru bara 11 dagar þangað til að ég get knúsað þig :). Annars hlakka ég alveg gífurlega mikið til að komast heim og fara sama kvöld í afmæliveisluna til Helgu, það verður geggjað stuð.
Það er nú voðalega lítið annað að frétta, er ekkert búin að fara í skólann (þar sem að öll kennsla er búin) og ég fæ ekki heimaprófið fyrr en á morgun. Þannig að ég ætla bara að segja þetta gott.

Búin með tvo kúrsa af þremur, jibbí. Reyndar veit ég nú ekki hvort að ég hef staðist þá (fæ bara einkunnina staðist eða ekki staðist) en það reddast vonandi. Mér gekk semsagt alveg ágætlega að flytja verkefnið okkar. Allir Danirnir sögðu að þeir hefðu alveg skilið mig, að ég hefði reyndar talað dálítið hratt og líka hljómað dálítið norsk ;). En það var auðvitað fyrir mestu að þeir skildu mig.
Ég var núna bara að koma af jólahlaðborðinu og það var ekkert smá gaman. Rosalega góður matur og skemmtilegur félagsskapur. Hinsvegar var ekki gaman að horfa á gamanleikritið sem kom á eftir matnum vegna þess að maður skildi ekkert allt. Þar sem að Íslendingarnir sátu allir saman þá var okkar borð frekar þögult þegar að hin borðin sprungu úr hlátri yfir einhverjum brandaranum :). Örugglega frekar skondið að sjá okkur þarna.

Jæja, bara tveir dagar eftir af skólanum og þá kemur 4 daga frí áður en heimaprófið byrjar. Þessir tveir seinustu dagar verða nú dálítið strembnir þar sem að ég og hópurinn minn erum að fara að flytja verkefnið okkar í Vinnusálfræði á morgun. Ég á semsagt að lesa kynninguna á verkefninu okkar fyrir u.þ.b. 20 manns og það á dönsku!! Ég hlýt að hafa verið á lyfjum þegar að ég samþykkti þetta. Vonandi á þetta samt eftir að reddast, reyndar er hópurinn minn alveg búinn að bjóðast til þess að hjálpa mér ef mig rekur í vörðurnar þannig að það er gott að vita af því.
Á föstudaginn er svo síðasti kennsludagur í Vinnusálfræði og þar eigum við að segja hvernig okkur hafi fundist verkefnið vera, hvernig kúrsinn var, hvernig hópurinn vann saman o.s.frv. Þannig að ég hlakka mjög til klukkan 4 á föstudag af því að þá er verkefnið búið og kennsla líka :).
Svo skila ég líka öðru verkefni á föstudag og þá er ég búin með tvo kúrsa, jej. Við skilum semsagt bara einu stóru verkefni í hverjum kúrs þannig að það er voðalega næs að það sé búið.
Á laugardaginn er svo Julefest hjá sálfræðideildinni, nokkurs konar jólahlaðborð. Flestallir íslensku sálfræðinemarnir ætla að fara þannig að ég ákvað bara að skella mér með líka og hlakka bara til. Eins gott að slappa líka aðeins af áður en 9 daga heimaprófið mitt byrjar þar sem að við fáum 2 spurningar, eigum að velja aðra og skrifa 10 bls. langt svar :s.
En semsagt allir að hugsa vel til mín klukkan 5 á morgun af því að þá byrjar kynningin á verkefninu okkar.

Við vorum að skríða fram úr rúminu og klukkan er að verða þrjú. Jesús minn, hvað það er hægt að sofa mikið stundum. En það var ekkert smá gaman í gær. Við hittum Karen og Grétar niðri í bæ og horfðum á jólasveininn aka framhjá og kasta í okkur nammi :). Svo var kveikt á öllum jólaljósunum á Strikinu í einu og það var ekkert smá flott. Enda eru þetta víst eitthvað um 500.000 perur.
Svo var farið að fá sér að borða og við enduðum á McDonalds, rosalega fínt :). Reyndar löbbuðum við um allan bæ fyrst til að reyna að finna annan stað en það var troðfullt á öllum stöðum bara.
Kvöldið endaði svo á að fara í bíó á Bridget Jones og oh my god hvað hún er góð. Ég lá í kasti yfir þó nokkuð mörgum atriðum.
Fyrsti sunnudagur í aðventu er á morgun og ég er komin í voðalega lítið jólaskap miðað við venjulega. Ég er nú reyndar búin að kaupa flestar jólagjafirnar og maður komst pínkulítið meira jólaskap þegar að kveikt var á jólaljósunum í gær en mér finnst samt vanta eithvað. Veit samt í raun ekki hvað það er. Held að það sé að við tókum ekkert jólaskraut með okkur og allavega hjá mér eru svo margar minningar bundnar við jólaskrautið þannig að mér finnst svo æðislegt að setja það upp. Ég er nú reyndar búin að kaupa dálítið af jólaskrauti hérna úti en eins og ég segi, mér finnst vanta eitthvað.

Ásta er komin til Árósa og það var ekkert smá frábært að sjá hana :). Við tvær fórum niður í bæ í dag og versluðum jólagjafir. Ég gat keypt jólagjafir fyrir mömmu og pabba og svo er ég líka búin að kaupa nokkrar jólagjafir fyrir Árna. Þannig að núna eigum við bara eftir að kaupa 5 jólagjafir.
Ásta heimtaði endilega að kaupa handa mér afmælisgjöf þannig að ég fékk spilið Catan (sem er geðveikt skemmtilegt) og bók eftir Noru Roberts. Vei vei.
Við buðum Ástu svo í mat, í piparsteik og tilheyrandi og sátum svo og spiluðum Catan. Ekkert smá gaman.
En annars er bara alltaf að styttast í skil á tveimur verkefnum og svo fer ég í heimapróf frá 8. - 17. des. Þannig að næstu vikur verða frekar busy sem er líklegast bara ágætt af því að þá líður tíminn svo hratt og þá verðum við bara komin heim áður en við vitum af.

Telia Stofa, sem er sjónvarpsfyrirtæki hérna, ákvað að slökkva á kapalnum okkar á miðvikudag þannig að við getum núna bara horft á 4 stöðvar (vorum semsagt með 40 stöðvar). Við hringdum alveg um leið og vildum fá áframhaldandi áskrift (við höfðum nefnilega aldrei borgað neitt, vorum á áskrift þeirra sem bjuggu hérna á undan okkur þannig að lokunin kom svo sem ekkert á óvart). Við héldum að þetta tæki einn dag en nei nei, þá fáum við ekki allar stöðvarnar aftur fyrr en á mánudag :(. Þar sem að þessar 4 stöðvar eru ríkissjónvarpið og aðrar leiðinlegar stöðvar þá erum við búin að vera rosalega dugleg að leigja myndir síðan á miðvikudag. Við erum búin að taka Troy sem er alveg frábær mynd finnst mér, svo tókum við Down with Love en ég sofnaði yfir henni og náði ekki að horfa á hana áður en við áttum að skila en byrjunin lofaði allavega góðu. Svo í kvöld tókum við Mystic River, hlakka rosalega til að horfa á hana.
Svo kemur Ásta á sunnudag. Jej, hlakka geðveikt til að sjá hana. Hún ætlar að vera í Århus í viku (gistir hjá systur sinni) en það verður allavega nógur tími til að hitta hana og gera eitthvað skemmtilegt. Ætla sko að draga hana með mér í Ikea og skoða jólaskraut, vei vei.
Góða helgi allir saman. (P.S. Minna en mánuður þangað til að við komum heim).

Alveg frábær helgi búin. Helga kom til okkar um tvöleytið á föstudeginum og Árni sótti hana niður á lestarstöð af því að ég var ennþá í skólanum. Það var ekkert smá skrýtið að sjá hana sitja í sófanum hérna þegar að ég labbaði inn. Svo gott að sjá hana :). Föstudagskvöldið var frekar rólegt, sátum bara heima og töluðum saman og fengum okkur smá í glas, rosalega næs. Ég þurfti svo að fara aftur í skólann á laugardeginum þannig að Árni og Helga fóru smá niður í bæ. Við komum svo heim á ca. sama tíma og þá voru þau búin að kaupa til að gera heitt súkkulaði, brauð og marmelaði. Ekkert smá gott, nammi namm.
Planið var svo að fara til Karenar og Grétars í fordrykk og fara svo á eitthvað skrall. Við fórum til þeirra en við stelpurnar þurftum svo mikið að tala saman að það var bara ákveðið að panta pizzu og við enduðum á að vera hjá þeim til þrjú. Ekkert smá gaman að sitja bara og spjalla um allt og hlusta á góða tónlist.
Þetta var nokkurs konar afmælisfagnaður fyrir mig þannig að ég fékk afmælisgjafir frá öllum stelpunum. Ég fékk semsagt rosalega flottan hring og svo saltkvörn í stíl við piparkvörnina okkar. Takk kærlega fyrir mig krúttur.
Núna erum við bara að fá okkur að borða af því að Helga þarf að ná lestinni klukkan 2. Þetta var bara alltof stutt en samt alveg frábært að hún gat komið svona til okkar.

Jæja þá er maður orðinn 25 ára gamall, oh my god :). Dagurinn byrjaði bara vel, fékk þrjá pakka frá Árna mínum, fékk bók, dvd mynd (Bridget Jones´ Diary) og jólastyttu (ekkert smá sæta).
Svo fékk ég pakka bæði frá mömmu og pabba og tengdó. Frá mömmu og pabba fékk ég Dalalíf (bækurnar, ekki myndina), allar 5 bækurnar í rosalega flottum kassa. Auðvitað strax byrjuð að lesa þær (er ekki búin að lesa þær nema svona 3svar). Þetta er semsagt alveg uppáhaldsbókin mín, aðeins um 2.000 bls og alveg ekta ástarsaga.
Frá tengdó fékk ég tvær rosalega fallegar peysur og svo fengum við hjónakornin nammi líka, grænan risaópal, kúlusúkk, flóridabita og hraunbita. Nammi namm.
Svo á Sólveig systir líka afmæli í dag. Pælið í hvað hún var heppin að fá mig í afmælisgjöf fyrir 25 árum síðan :). En til hamingju með afmælið elsku Sollý mín. Við erum búnar að halda upp á afmælin okkar saman undanfarin ár af því að þá þarf fjölskyldan bara að koma á einn stað og ég verð að viðurkenna að ég sakna þess að vera ekki búin að baka rosalega mikið og geta séð alla fölskylduna á einu bretti, sérstaklega á svona degi.

Annar kennsludagur í Vinnusálfræði er búinn og núna var okkur skipt í hópa. Ég lenti í hóp með þremur Dönum sem virtust ekkert vera alltof ánægðir að vera í hóp með Íslending. En það verður bara að hafa það, þau sitja víst uppi með mig. Við fengum líka verkefnið okkar, eigum semsagt að fara í leikskóla og athuga af hverju starfsmennirnir taka ekki ábyrgð á verkefnum sínum. Eigum að fara að hitta forstöðumanninn núna á fimmtudag. Hljómar alveg ágætlega og skemmtilegt að fá að fara út í atvinnulífið.
Það var nú mest lítið gert um helgina, misstum alveg af J-deginum (sem er þegar að jólabjórinn kemur). Þá koma Tuborg trukkar niður í bæ og gefa öllum bjór sem eru þar (akkúrat kl. 20:59). Heyrði einmitt eina sögu af Íslendingum sem voru ekkert að flýta sér í bæinn og mættu ekki fyrr en korter í tíu en þá voru bara allir Tuborg trukkarnir farnir og ekki meiri ókeypis bjór. Alveg týpískt fyrir Íslendinga. Reyndar vissum við alveg af þessum degi en það er svo brjálað að gera hjá Árna að hann hafði ekki tíma til að fara niður í bæ.
Enda þurfum við ekkert meiri bjór af því að við eigum ennþá þrjá kassa af bjór sem að Árni keypti í fótboltaferðinni (greinilega ekki miklir bjórþjambarar sem búa hér). Það verður allavega nógur bjór fyrir Helgu og Ástu þegar að þær koma hingað :). Þetta er reyndar ekki Corona, sorry Helga :)

Eins og ég bjóst við, ég fann ekki neitt á mig :(. Ég veit samt alveg hvað vantaði, Hrönn var ekki með okkur en það er alveg langbest að fara að versla með henni. Hún finnur nefnilega alltaf eitthvað á mann. Hrönn þarf semsagt bara að koma hingað út :) og þá finn ég pottþétt eitthvað. En þar sem að hún kemur ekki fyrir afmælið mitt þá fæ ég líklegast engin föt í afmælisgjöf frá Árna.

Laufey systir hans Árna á afmæli í dag og er þar af leiðandi í besta stjörnumerkinu :). Til hamingju með afmælið Laufey mín.

Ég hlakka svo til á morgun. Þá ætlum ég og Árni niður í bæ og ég fæ að kaupa mér föt í afmælisgjöf, vei vei vei. Vona bara að ég finni eitthvað á mig. Það er nefnilega oftast þannig að þegar að maður ætlar að kaupa sér eitthvað þá finnur maður nákvæmlega ekki neitt.
Við ætlum líka að reyna að finna einhverjar jólagjafir, erum bara búin að kaupa 5, höfum aldrei verið svona sein :).
Í próffræði átti maður að velja sér hópa eftir því efni sem maður hafði mestan áhuga á. Ég valdi mér taugasálfræði og þetta eru bara nokkuð skemmtilegir tímar. Við fengum verkefnið okkar í hendurnar í dag og það er þannig að við fengum niðurstöður úr ýmsum prófum sem einn einstaklingur hafði gert og frá niðurstöðunum af prófunum eigum við að geta sagt um hvort að það sé í raun eitthvað að einstaklingnum, hvaða hluti heilans gæti verið skaddaður o.s.frv. Frekar skemmtilegt að fá svona, erum með alveg raunverulegar niðurstöður þannig að það verður spennandi að vita hvað kemur út úr þessu. Vona bara að við getum greint einstaklinginn rétt ;).

Lífið hérna í Danmörku er eitthvað voðalega rólegt í augnablikinu. Við gerum nákvæmlega ekkert annað en að fara í skólann, læra, fara í búð og sofa. Geðveikt skemmtilegt að blogga um það :).
Ætli maður sé bara ekki að spara sig þangað til að vinkonurnar koma. Get varla beðið eftir að sjá þær. Fara niður í bæ og á kaffihús og svona, ógó gaman.
Annars var mjög fínt í tíma í gær, kennarinn talaði nefnilega ensku jej. Það var mög gott að vera í tíma þar sem að maður skildi allt og þurfti ekki að rembast við að skilja helminginn af því sem kennarinn sagði. Svo kennir þessi kennari okkur aftur í lok nóvember, gaman gaman.

Ingibjörg vinkona er að útskrifast sem lyfjafræðingur í dag. Innilega til hamingju með daginn elsku Ingibjörg. Vildi að við gætum verið heima á Íslandi og fagnað þessu með þér en það verður víst bara að bíða þangað til í desember :).
Annars er nú helst í fréttum að fyrsti tíminn í vinnusálfræði var í gær. Tíminn var semsagt frá 9-4 og gekk alveg ágætlega. Reyndar var ég nú orðið dálítið rugluð í hausnum upp á það síðasta. Ég og Hildur töluðum íslensku saman, Danirnir töluðu dönsku við okkur og við svöruðum þeim á svona mest á ensku en stundum samt á dönsku reyndar. Frekar ruglandi :). Annars lítur þessi kúrs bara vel út og Danirnir eru mjög tillitssamir við okkur.
Svo í kvöld er partý hjá íslensku sálfræðinemenunum. 2. árs nemar buðu 1. árs nemum í partý svo að þeir gætu miðlað af reynslu sinni ;).

Hjörvar Þór frændi minn er 10 ára í dag, til hamingju með afmælið elsku frændi :).

Árni fór í fyrsta prófið sitt í dag og stóð sig líka svona svakalega vel. Hann fékk 10, til hamingju með það ástin mín. Einkunnaskalinn í Danmörku er nefnilega frá 13, svo er ekki gefið 12, næst 11 og svo niður úr. Þannig að þetta er svona 8,5 á íslenskum kvarða, ógó flott. Svo á hann að skila ritgerð 1. nóvember og þá er hann búinn í tveimur fögum, frekar skrýtið kerfi.

Það er bara allt að gerast þessa dagana. Hrönn og Axel voru að spá í að koma til okkar og nýta vildartilboðið sem þau fengu sent en svo hættu þau við því að Axel er svo upptekinn í vinnunni í nóvember (skamm Axel). Svo kom Ásta næst með fréttir að hún ætlaði að koma til okkar og hún kemur líklegast 22. nóv, geðveikt gaman og verður vonandi í viku. Þannig að Helga fer frá okkur 14. nóv og þá er bara vika í að Ásta kemur. Þvílíkt að gerast í heimsóknum.
Svo hef ég alltaf gleymt að segja að mamma og pabbi pöntuðu flug til okkar 14. febrúar og fengu það meira segja á 5 kr. Geðveikt gaman. Það verður svo mikið næs að fá þau hingað :).
Það gekk bara vel í "umræðutímanum" á mánudag. Þetta var semsagt ekki umræðutími heldur bara venjulegur fyrirlestur (bara í aðeins minni hópum), hefði átt að kvíða aðeins meira fyrir.

Búin að setja inn nokkrar niðurtalningar hérna til hægri.

Ég gleymdi að óska ömmu til hamingju með afmælið en hún er 94 ára í dag. Til hamingju með afmælið amma mín (ekki að það seu miklar líkur að hún lesi bloggið mitt ;)).

Haustfríið alveg að verða búið og ég er byrjuð að kvíða fyrir því að fara aftur í skólann :(. Umræðutímarnir mínir byrja nefnilega á mánudaginn og svo byrjar Vinnusálfræðikúrsinn minn á föstudag og sá kúrs er í rauninni bara umræðutími líka. En vonandi á þetta allt eftir að reddast.
Annars er ég búin að vera dugleg að læra í haustfríinu og það er rosalega næs að fá svona frí á miðri önn. Karen, Grétar og Anna Heiða komu svo í mat til okkar á fimmtudag og það var ekkert smá gaman að sjá Önnu Heiðu. Við skemmtum okkur rosalega vel og spjölluðum mikið saman. Takk fyrir komuna, you guys.
Annars er alltaf að styttast í afmælisdaginn minn, vei vei vei. Þegar að Árni verður búinn að skila ritgerðinni sinni þá ætlum við að fara niður í bæ og ég má velja mér afmælisgjöf frá honum. Hlakka geðveikt til.
Svo bara til að minna ykkur vinina á þá virkar netfangið mitt alveg fínt (flestir virðast nefnilega halda að það virki ekki af því að ég er búin að fá svona 10 tölvupósta frá vinum mínum síðan að ég flutti út).

Við erum búin að breyta flugmiðanum okkar!! Við komum semsagt heim 18. des um hálffjögur en förum aftur til Danmerkur 2. jan. Ekkert smá gaman að geta aðeins lengt heimferðina, hlakka svo mikið til að sjá og knúsa alla.

Það er ekkert smá gott að vera í haustfríi, reyndar er ég alveg búin að snúa sólarhringnum við en það er bara gott :).
Ég og Árni fórum á föstudaginn niður í bæ og fengum okkur rjómalagaða fiskisúpu með risarækjum, nammi namm, hún var ekkert smá góð. Svo komu Karen og Grétar í heimsókn þegar að við vorum komin heim og við spjölluðum saman.
Á gær var okkur svo boðið í mat til Karenar og Grétars og svo fórum við Karen í stelpupartý. Það var ekkert smá gaman, alltaf skemmtilegt að hitta hressar stelpur. Við fórum svo þrjár niður í bæ og skemmtum okkur bara ágætlega.
Ég vaknaði svo ekki fyrr en klukkan hálftvö í dag (ekki alveg nógu gott) og lærði smá en fór svo að elda. Eldaði semsagt piparsteik með bökuðum kartöflum, sveppasósu og salati, nammi namm, ógó gott.
Svo er bara mánuður í dag þangað til að mín verður 25 ára, vei vei vei. En ætli ég verði ekki að halda áfram að læra núna svo að ég geti fylgt læruplaninu mínu.

Mín bara komin í haustfrí :). Frekar ljúft en það verður samt bara tekið á því og lært mikið. Ég hef aldrei (síðan að ég byrjaði í sálfræðinni) verið svona langt á eftir í að lesa. Og ég er bara í tveimur fögum, frekar fyndið.
Á laugardaginn er stelpupartý hjá Tótu, vinkonu Karenar. Ég hlakka bara mjög til að fara og kynnast fleiri Íslendingum, gaman gaman. Það þýðir að ég þarf að fara niður í bæ og kaupa Asti Martini, ekki alveg að fíla að engin búð nálægt okkur selur vínið mitt :).
Árni ætlar að hafa Star Wars kvöld þá, við vorum nefnilega að kaupa Star Wars Trilogy, ég hef nú séð allar þessar myndir (frekar langt síðan reyndar) og fannst þær mjög skemmtilegar en samt tókst mér að sofna yfir fyrstu myndinni. Þannig að Árni ætlar að nýta tækifærið og horfa á tvær seinustu myndirnar og þá get ég bara horft á þær þegar að ég hef tíma og svona.
P.S. Mæli með laginu hennar Anastaciu, Sick and Tired. Ekkert smá flott lag enda er ég búin að vera með það á replay í allt kvöld :).

Jæja helgin búin. Þetta var samt alveg hin besta helgi. Á föstudaginn förum við hjónin að versla jólagjafir og gátum keypt alveg 5, ekkert smá dugleg. Við keyptum líka húfur á okkur svo að okkur verði ekki kalt á hjólunum okkar. Ekkert smá sæt með húfurnar :).
Á laugardaginn fór Árni til Grétars og Karen um hádegið og setti upp nýju tölvuna þeirra. Ég var eftir heima og lærði smá en fór svo til þeirra um fimmleytið af því að Karen og Grétar ætluðu að bjóða okkur í mat. Og hvílíkur matur, ekkert smá góður kjúklingur, nammi namm. Svo gáfu þau okkur líka brúðkaupsgjöf/innflutningsgjöf. Fengum karöflu frá Rosendahl, dropastoppara og tappa, ekkert smá flott. Takk kærlega fyrir okkur krúsirnar mínar :).
Svo á bara að læra í dag, þ.e.a.s. þegar að maður kemur sér að því að læra.

Ég á bara yndislegustu foreldra í heimi. Mamma hjálpaði mér rosalega mikið að pakka þegar að við fluttum út og ég var alltaf að finna svona pakka frá þeim inn á milli fatnaðs þegar að ég var að taka upp úr töskunum. Ég er t.d. búin að finna nokkrar úrklippur af Ást er, bók og fleira. En við erum semsagt aldrei búin að taka almennilega úr töskunum og núna var loksins komið nóg pláss til að taka alveg úr töskunum og þá fann ég lítið myndaalbúm með ýmsum myndum af mér og Árna, myndir af mér þegar að ég var lítil, brúðkaupsmyndir af okkur, kisumyndir og auðvitað eldgamlar fjölskyldumyndir.
Það var svo yndislegt að sjá þessar myndir (reyndar fékk Árni hláturskast af sumum myndunum af mér þegar að ég var lítil, skil ekkert í honum, ég var svo sæt með kisugleraugun mín ;)). En ætlaði bara að segja takk elsku mamma og pabbi.

Jæja ég vaknaði í morgun og leið mikið betur og ákvað því að drífa mig í skólann. Fór reyndar með strætó því að ég ætlaði ekki að láta mér slá strax niður. En svo þegar að ég kom heim var auðvitað ekkert til að borða þannig að ég ákvað að hjóla í Fotex og kaupa smá inn. Svo fannst mér eitthvað allt í svo miklu drasli þannig að ég tók aðeins til. Voðalega orkurík eitthvað eftir þessi veikindi.
Árni kom svo heim úr skólanum um fimmleytið og um sjöleytið ákváðum við að hjóla í Ikea og klára loksins að kaupa það sem okkur vantar í heimilið. Við keyptum semsagt sófaborð og hornborð, herðatré og lampa. Einnig keyptum við frekar stóra herðaslá því að það er svo lítið pláss í skápunum okkar að þau föt sem þurfa að hanga á herðatrjám komast ekki öll fyrir. Og við reddum þetta allt heim á hjólunum, geðveikt dugleg. Kassinn utan um herðaslána er t.d. 160 cm langur þannig að þetta var frekar erfitt.
Núna sit ég semsagt og blogga :) á meðan Árni er að setja saman herðaslána.
Svo ætlum við að fara að versla jólagjafir á föstudaginn, vei vei vei. Alveg komin í jólaskapið :).

Minns er aftur orðinn veikur. Ekki gaman. Ég skil samt ekki að ég sem er aldrei veik er núna búin að vera tvisvar veik á einum og hálfum mánuði.
Mér leið semsagt ekkert alltof vel á föstudaginn, var með smá kvef og höfuðverk en ákvað samt að drífa mig í partý með íslensku sálfræðinemunum. Það var ekkert smá gaman, enginn af strákunum lét sjá sig þannig að þetta var bara ekta stelpupartý, mjög fínt.
En svo á laugardaginn leið mér verr og ég er ekki búin að fara út í fjóra daga, er með dúndrandi höfuðverk allan daginn, hellu fyrir eyrunum og stíflað nef. Ég er nú samt að vona að mér fari að líða betur, ég hata að vera veik. Reyndar er einn kostur við það, Árni gerir allt sem ég bið hann um, fer út í búð að kaupa nammi, eldar og vaskar upp ;). En mér finnst samt betra að vera hraust og gera eitthvað sjálf á heimilinu en að líða svona.
Svo var ég að fá frábærar fréttir. Helga vinkona ætlar líklegast að koma hingað 12. - 14. nóv. Jibbí. Hún kemur semsagt spes til að óska mér til hamingju með afmælið, nei kannski ekki alveg. Hún er að fara að verja lokaritgerðina sína í Svíþjóð vikunni á undan og ætlar að koma með lestinni hingað og fljúga svo bara heim frá Köben. Oh hvað ég hlakka til að sjá hana. Það verður ekkert smá gaman.

Það er eitthvað voðalega lítið að gerast hjá mér þessa dagana. Ég er búin að vera í miklu fríi frá skólanum því að það eru einhverjar ráðstefnur og ráðstefnurnar eru alltaf í salnum sem okkur er kennt í. Þannig að nokkrir kennsludagar eru búnir að falla niður. Það er samt alveg fínt, er búin að vera dugleg að læra. Reyndar er ég nú ekki sátt við það að ég keypti mér áherslupenna í síðustu viku og þeir eru allir búnir!! Skil það ekki alveg, hvað þeir endast stutt. Ég er nefnilega þannig að ég get ekki lesið án áherslupenna, bara eitthvað sem ég er búin að venja mig á, þannig að núna get ég ekkert lesið. Verð að bíða þangað til á morgun þegar að ég kemst í bæinn.
Svo er haustfríið bráðum að skella á, verð í fríi frá 7. - 17. október. Það verður voðalega næs, en ætli maður verði ekki bara heima að lesa. Við getum örugglega ekki skroppið til Kaupmannahafnar vegna þess að Árni er að fara í próf og þarf að skila ritgerð um leið og haustfríið endar.
Reyndar kvíði ég fyrir því þegar að þriðji kúrsinn minn byrjar. Þá fer ég í Vinnusálfræði. Málið er bara að þessi kúrs byrjar 22. október. Þetta eru semsagt umræðutímar þannig að ég verð að gjöra svo vel að skilja dönskuna alveg (og tala hana) því að einkunnin byggist einungis á virkri þátttöku í tímum. Og það er svo stutt í hann og ég er ekki alveg komin á það stig að skilja dönskuna fullkomlega, hvað þá að tjá mig á henni. En þetta hlýtur að reddast, vonum það allavega.

Þessi helgi er búin að vera frábær. Á föstudaginn fór ég og hitti íslensku sálfræðinemana á fyrsta og öðru ári og það var ekkert smá skemmtilegt. Fórum og fengum okkur að borða og fórum svo á nokkra skemmtistaði. Ég fór reyndar snemma heim (til að ná strætó). Ekkert smá fyndið að taka strætó bæði á djammið og heim líka, mér leið eins og ég væri 17 ára :).
Svo lærði ég aðeins í gær en fór svo til Karenar og við höfðum stelpukvöld sem var ekkert smá næs. Við elduðum pizzu, tókum ekta stelpumynd sem heitir Calendar girls og hún var bara geðveikt góð. Svo borðuðum við líka fullt af nammi og við spjölluðum rosalega mikið. Ég gisti svo bara hjá henni fyrst að við vorum einar um helgina og við vöknuðum ekki fyrr en um tólfleytið, alltof seint :). Núna er ég bara komin heim og ætla að fara að læra. Árni kemur svo heim af fótboltamótinu seinna í dag, hlakka svo til að sjá hann.

Jæja hérna kemur mynd af snoðuðum Árna :). Hann er ekkert smá sætur, finnst ykkur það ekki?
Ég og Karen fórum niður í bæ í dag og versluðum aðeins, ég fann meira að segja búð sem selur Asti Martini og keypti mér eina, vei vei. Svo settumst við aðeins niður á kaffihúsi og fengum okkur heitt súkkulaði og latte, nammi namm.
Svo á föstudaginn er smá hittingur hjá íslensku sálfræðinemunum. Ég ætla nú að fara og hitta þá, það verður örugglega mjög gaman.

Það er nú voðalega lítið að gerast hjá mér þessa dagana. Ég er einhvern veginn ekki kominn í lærugírinn ennþá enda er voðalega skrýtið að vera bara í tveimur fögum (þriðja fagið byrjar ekki fyrr en í október). Þegar að maður hefur lítið að gera þá verður maður eitthvað svo latur.
Við gerðum svo mest lítið um helgina. Karen og Grétar komu reyndar í mat á föstudaginn, ekkert smá gaman að fá þau. Við töluðum bara saman og höfðum það næs. Svo snoðaði Árni sig í gær og er ekkert smá sætur :).
Næstu helgi er svo stelpupartý hjá vinkonu hennar Karenar og mér er boðið með, jei. Það verður örugglega mjög gaman.
Árni er svo kannski að fara með Grétari á eitthvað fótboltamót núna um helgina, ég veit reyndar ekkert hvar það verður en þeir munu gista þar alla helgina. Þannig að ég og Karen ætlum kannski að taka videó og hafa það næs (og borða nammi ;)).

Mamma mín á afmæli í dag, til hamingju með afmælið elsku mamma. Vildi að ég gæti verið heima og fengið kökur ;).
Svo erum við búin að panta ferð heim, jibbí. Við lendum um hálfellefu 22. des og förum aftur 2. jan klukkan hálfþrjú. Frekar stutt en kerfið hjá Árna er svo skrýtið að hann veit ekkert hvenær hann fer í próf fyrr en í lok október og við getum ekki beðið svo lengi með að panta flugið.
Svo er ég líklegast líka orðin veik, samt ekki með sömu flensu og Árni. Ég er með höfuðverk og virðist vera að fá hálsbólgu.

Árni er orðinn veikur :(. Ekki gaman. Hann vaknaði í morgun og var að deyja úr beinverkjum og er með hita þannig að hann tók því bara rólega í dag enda átti hann ekkert að mæta í tíma. Við ætluðum að bjóða Karen og Grétari í mat en það verður víst að bíða aðeins.
Ég fór í annan tímann minn í dag og var mjög ánægð að heyra að það eiga ekki að vera æfingatímar á miðvikudögum eins og sagt var. Þannig að ég er í fríi á miðvikudögum, vei vei.

Var að fá tölvupóst frá mömmu og pabba og þau eru að segja að Snúðurinn okkar hafi þurft að fara til dýralæknis vegna þess að hann var tvíbitinn á vinstra fæti og þurfti að fá deyfingu og sýklalyf. Æ æ greyið manns, ekki gaman að heyra svona þegar að maður er í öðru landi. En þetta á alveg að lagast, vonum bara það besta. Svo þarf maður að vera inni í þrjá daga, maður er nú örugglega ekkert voðalega sáttur við það.

Það eru tveir sem eiga afmæli í dag. Tengdapabbi er 53 ára, til hamingju með afmælið Einar. Svo er það Snúðurinn minn sem er 2 ára í dag, til hamingju með kisuafmælið elsku Snúður minn. Vildi að ég gæti verið heima og knúsað þig.
Annars var bara mjög gaman í dag, fór í skólann klukkan 2 og var til 5. Skildi nú reyndar mest lítið af því sem kennarinn sagði en það hjálpaði til að kennarinn dreifði útprentuðum glærum og þótt að þær væru á dönsku þá skildi maður aðeins meira en ella.
Svo ætlum við að fara í heimsókn til Karenar og Grétars á eftir og við erum búin að bjóða þeim svo í mat á morgun til að þakka fyrir hjálpsemina í þeim þegar að við fluttum hingað.

Vá hvað ég var búin á því í dag. Dagurinn hjá mér byrjaði á því að ég hjólaði og hitti Árna á McDonalds (eftir að hann var búinn í skólanum) og við fengum okkur að borða þar. Svo fórum við í Nettó og keyptum smá inn, fórum heim og skiluðum af okkur vörunum sem við keyptum þar. Eftir það var hjólað í Fotex (til að kaupa það sem ekki var til í Nettó) og hjólað aftur heim með vörur. Svo var hjólað aftur í Fotex, hjólin skilin eftir og við keyptum tvo kassa af bjór (einn kassi er með 30 bjórum og kostar 80 dk). Við röltum svo með það heim í innkaupakörfu, svo var aftur farið í Fotex til að skila körfunni og svo hjólað aftur heim. Og það var svo gott að geta fleygt sér í sófann ;).
Skólinn byrjar á mánudaginn og þá er fríið manns víst búið. Eins gott að reyna að snúa sólarhringnum aftur við svo að maður geti mætt ferskur í skólann.

Jæja þá er ég búin að komast að þessu varðandi skólann. Ég er semsagt alveg komin inn :) mjög ánægð með það (greinilega bara einhver misskilningur hjá mér) og ég byrja næsta mánudag.
Þetta skólakerfi hérna er samt eitthvað skrýtið, ég valdi á milli klínískrar sálfræði og vinnusálfræði (semsagt hvort ég vildi sérhæfa mig í og ég valdi vinnusálfræði) en samt á ég líka að taka einn kúrs í klínískri. Frekar fyndið, ég spurði hana alveg spes út í það hvort að þetta væri örugglega svona og hún sagði margsinnis já þannig að ég er ekkert að misskilja neitt.
Svo spurði ég hana líka af hverju maður ætti að velja á milli þegar að maður fer svo í bæði og svarið hennar var: Svo að maður geti sérhæft sig. Hjálpaði mér voðalega mikið en ég hef litlar áhyggjur af þessu, ég fer hvort eð er ekkert í vinnusálfræði fyrr en á næstu önn þannig að þá verð ég örugglega búin að skilja þetta kerfi.
Stundaskráin mín er fín, er bara á mánudögum (2-5), þriðjudögum (11-5) og svo á miðvikudögum (11-13), mjög gott.
Svo bætist reyndar nokkrum sinnum við að ég á að fara í skólann á föstudögum og verð þá frá 9-4 og svo líka tvo laugardaga en það verður ekki fyrr en í nóvember.
En allavega, ég er mjög ánægð að þetta skuli vera komið á hreint.
Svo er ég alveg búin að finna uppáhaldsstöðina mína hérna, veit reyndar ekkert hvað hún heitir en hún sýnir gamla Beverly Hills þætti á hverjum degi. Maður liggur í kasti alveg ;).
En ætla að fara að horfa á gamla Sex and The City þætti. Knúsíknús.

Hæ hæ það eru komnar nýjar myndir frá Danmörku, endilega kíkið á þær.

Jæja núna erum við búin að vera hérna í nærri tvær vikur og okkur líður bara vel. Ég sakna samt allra sem eru heima en það eru bara fjórir mánuðir þangað til að við komum heim í jólafrí, jibbí.
Annars er nú búið að vera mest lítið að gera hjá mér, fór reyndar á kynningu hjá skólanum en þar sem kynningin var á dönsku skildi ég eiginlega ekkert og pantaði því tíma hjá námsráðgjafa eða eitthvað þannig til að hann gæti skýrt þetta út fyrir mér. Ég á semsagt tíma hjá honum á miðvikudaginn og þá fer þetta nú allt að skýrast, vonandi.
Svo erum við bara búin að vera að slappa af, Árni er strax byrjaður að læra, rosalega duglegur og ég er búin að vera rosalega dugleg að sauma í jólakrosssauminn minn ;).
Heyrðu svo erum við búin að finna besta ís í heimi, frá Haagen Daaz. Bragðið er með vanillu, karamellu og brownie bitum, ekkert smá góður, nammi namm.
En ætla að segja þetta gott núna og fara að athuga hvort að eitthvað sé í sjónvarpinu (erum með alveg 40 stöðvar þannig að það er alltaf hægt að finna eitthvað).

Jæja þá er byrjuð að koma smá mynd á íbúðina okkar. Við erum komin með eldhúsborð og 4 klappstóla (þannig að það er hægt að sitja annars staðar en á vindsænginni) og á morgun fáum við sófann okkar og líklegast rúmið líka, hlakka svo til.
Við hjóluðum í nokkrar búðir í gær og ég var gjörsamlega búin á því eftir fyrstu brekkuna (alveg ekkert þol) en það lagaðist fljótt. Verð bara að vera dugleg að æfa mig að hjóla.
Svo reyndi ég að tala við mömmu og pabba í gær í gegnum MSN en það var ekkert smá fyndið. Þau heyrðu nefnilega ekkert í mér en ég heyrði í þeim þannig að ég skrifaði allt sem ég sagði og svo töluðu þau við mig í gegnum mikrófóninn, örugglega frekar fyndið að horfa á okkur ;). Vona bara að það gangi betur næst, það er svo gott að geta talað svona saman.
Árni byrjar svo í skólanum á morgun, hann er bara 3 daga (í viku) í skólanum fyrstu 7 vikurnar þannig að það er mjög fínt. Svo hef ég enga hugmynd um hvenær ég byrja eða hvort ég byrji yfir höfuð vegna þess að þótt að ég hafi fengið bréf um að ég sé komin inn þá er það ekkert pottþétt, ekki alveg nógu gott. Ég er á fullu að senda þeim email en fæ engin svör. Ekkert smá asnalegt að láta mann flytja út til annars lands og svo bara segja: nei þú kemst kannski ekki inn (en samt er ég með bréf sem stendur að ég sé komin inn). En ég fer allavega í kynningu hjá þeim á fimmtudaginn og þá hlýtur þetta að koma betur í ljós.
En ætla að segja þetta gott núna og fara að horfa á Olympíuleikana. Knús til allra.

Vá hvað við erum búin að kaupa mikið, hornsófa, risastórt rúm, 28" widescreen sjónvarp (sem við fengum mikið ódýrara en það átti að kosta), eldhúsborð og svo ýmislegt smádót. Við tókum bíl á leigu í dag til að komast yfir allar búðirnar sem við áttum eftir og það hjálpaði okkur ekkert smá mikið, við skiljum ekki hvernig Karen og Grétar gátu komist yfir þetta án þess að vera á bíl. En við höfðum bílinn bara í dag, skilum honum eldsnemma á morgun og þá byrjar maður bara að hjóla og svona, keyptum einmitt líka hjól handa mér í dag, 18 gíra rosalega flott.
En núna erum við semsagt heima í nýju íbúðinni okkar og erum að fara að gista fyrstu nóttina þar. Það eina sem er í íbúðinni eru töskurnar okkar, sjónvarpið (auðvitað strax búin að tengja það) og svo vindsæng sem Karen og Grétar eiga. Við fáum nefnilega flest sent í næstu viku þannig að það verður frekar fátæklegt hjá okkur fyrstu dagana.
Svo vorum við að tala við mömmu og pabba og tengdó í gengum Msn og Skype, ekkert smá gaman að geta talað saman án þess að hafa áhyggjur af reikningnum. Maður er bara strax sítengdur (fylgir með húsaleigunni) þannig að það er rosalega fínt.
En ætla að fara að horfa á sjónvarpið. Knús til allra.

Gleymdi auðvitað að segja fullt ;). Nýja heimilisfangið okkar er:
Ladegårdskollegiet
Skejbyparken 360, st. L. 7
8200 Århus N
Svo erum við að vinna í því að fá okkur ný símanúmer og svona, gleymdum auðvitað að skrá nýtt lögheimili hjá Hagstofunni heima og við fáum ekki danska kennitölu fyrr en við gerum það og maður þarf danska kennitölu þegar að maður sækir um síma. Þannig að það tekur líklega dálítinn tíma að fá ný símanúmer.
En ætla að fara að hjálpa Karen og Árna elda, við fáum lasagna, nammi namm.

Jæja þá erum við komin til Aarhus. Ég var búin að vera þrjá daga í svo miklu stjani hjá mömmu og pabba að ég tímdi varla að fara, fékk uppáhaldsmatinn minn og svona. En svo lögðum við af stað upp á flugvöll um tólfleytið og vélin átti að fara kl. 14:50. En nei nei, þá var seinkun hjá Iceland Express þannig að við lögðum ekki af stað fyrr en um hálffimm, ekki nógu gott fyrir flughræddu mig. En flugið var mjög gott, lítil sem engin ókyrrð. En út af þessari seinkun náðum við ekki lest fyrr en kl. 00.11 (þurftum að bíða í tvo tíma á flugvellinum).
Þannig að við vorum komin til Aarhus klukkan 4 og vöktum auðvitað Karen og Grétar þá sem tóku geðveikt vel á móti okkur. Svo í dag erum við bara búin að vera að labba um og skoða íbúðina okkar, hún er rosalega fín, parket á öllum gólfum og svona. En maður er ekki búinn að átta sig á því að maður er ekki að fara heim eftir tvær þrjár viku, frekar skrýtið.
Svo á að fara í Ikea á morgun og versla sér eitthvað dót og reyna líka að finna rúm og svo kíkja aðeins upp í skóla og svona.
En ég ætlaði bara aðeins að blogga smá, sakna ykkar allra heima :). Knús og kossar.

Jæja núna er maður búinn að kveðja nokkra. Fór til pabba í gær og kvaddi hann því að hann var að fara til Bakkafjarðar aftur í dag þannig að ég á ekkert eftir að sjá hann aftur áður en við förum. Svo kvöddum við líka Hrönn og Axel því að þau skelltu sér í helgarferð til London í morgun og koma ekki aftur fyrr en á mánudagskvöld. Ég er samt einhvern veginn ekki að ná því að ég á ekki eftir að sjá þetta fólk fyrr en eftir 4 mánuði, frekar skrýtið sko.

Ég hata svona hita, líður best í svona 5-10 stiga hita og fullt af vindi. Núna sit ég í vinnunni þar sem loftræstingin er svo léleg og er gjörsamlega að stikna ;) og þarf að bíða til hálffimm því að Árni kemur þá að sækja mig.
Annars er ekkert í fréttum, njótum bara hjónalífsins í botn :). Fórum reyndar með dótið okkar í gám í dag og þá verður það komið til Aarhus 19. ágúst. Svo eru bara 4 dagar þangað til að við flytjum. Ég ætla einmitt að vera hjá mömmu og pabba alla helgina og fá svið og kjötsúpu í matinn, nammi namm.

Jæja búin að setja brúðkaupsmyndirnar inn sem og nokkrar myndir úr ýmsum áttum. Svona er maður fljótur þegar að maður hefur sér tölvu, vorum nefnilega að kaupa Think Pad x40 sem er geðveikt flott, nett og lítil. Endilega tékkið á myndunum. Vonandi koma svo seinna einhverjar fleiri brúðkaupsmyndir.

Gleymdi að segja frá tvennu. Í brúðkaupsveislunni spiluðu tveir vinir hans Árna fyrir okkur lagið okkar (More than words) á saxófon og trompet og svo fengu þeir til hjálpar við sig einn annan sem spilar á gítar. Þetta var svo flott hjá þeim, alveg yndislegt. Vantaði bara að hafa cameru til að taka þetta upp.
Svo gaf ég Árna úr í morgungjöf og hann gaf mér hring, ekkert smá flott ;)

Yndislegast dagur sem ég hef bara lifað var núna á laugardaginn þegar að ég giftist Árna mínum. Það var svo frábært að labba inn kirkjugólfið til hans, hlusta á prestinn gifta okkur og svo var Ríta svo frábær með hringana. Bergþór Pálsson söng í kirkjunni og ég táraðist alveg (eins og held ég fleiri). Hann söng Amazing Grace á íslensku, Grow old with me á íslensku og endaði svo á Loksins ég fann þig, alveg meiriháttar hjá honum. Svo fórum við í Grasagarðinn í Laugardag í myndatöku (gátum ekki farið í Hellisgerði af því að það var búið að rigna svo mikið yfir daginn) og þar vorum við inni í litlu kaffihúsi, ekkert smá sætt. Eftir þetta var farið á Hótel Sögu þar sem að allir biðu okkar og þvílíkt magn af hrísgrjónum :s. Svo tók bara við maturinn sem var rosalega góður og frábær skemmtiatriði, ræður frá pöbbunum okkar, við dönsuðum brúðarvalsinn, skárum kökuna og margt fleira. En þetta var svo frábært að við tímdum varla að þetta myndi enda.
Mamma og pabbi tóku fullt af myndum og ég ætla að reyna að setja þær inn í dag, sé nú til hvernig það gengur ;). En við erum semsagt bæði í fríi í dag, förum að vinna á morgun og vinnum þá í 4 daga enda er bara vika þangað til að við flytjum til Aarhus.
Svo fengum við auðvitað rosalega mikið af pökkum en ég nenni ekki að skrifa hvað við fengum, enda tæki hálftíma að skrifa það en allt var rosalega flott sem við fengum.

Jæja núna eru innan við 18 tímar að ég giftist Árna mínum. Það er svo skrýtið að þessi dagur sé kominn, maður er búinn að bíða svo lengi eftir honum. Ég hlakka svo mikið til en samt er ég dálítið stressuð (með höfuðverk og smá flökurt) en það hlýtur að hverfa í nótt.
Við fórum á æfinguna í dag og hittum prestinn og mér líst bara nokkuð vel á hann. Ríta var nú nærri því sofnuð í kirkjunni, algjört krútt. Vona bara að hún geti haldið sér vakandi á morgun ;).
Núna er ég bara heima hjá mömmu og pabba og við erum aðeins að spjalla saman og slappa af og svona. Reyndar á þessum þremur tímum síðan að ég kvaddi Árna þá er ég alltaf að muna eftir einhverju sem við höfum gleymt að gera þannig að ég er örugglega búin að hringja í hann svona 5 sinnum.

Loksins er þessi dagur búinn, að sitja og geta ekki gert neitt í 8 tíma er ömurlegast. En núna er ég komin í fimm daga frí, ekkert smá gaman.

Ég fór fyrr heim í gær vegna þess að það var ekkert að gera og núna í dag eru kerfin heldur ekki inni, það er svo ömurlegt að sitja fyrir framan tölvuna og hafa nákvæmlega ekkert að gera. Ég er svo ánægð að ég verð ekki að vinna á morgun og hinn, nenni ekki að standa í svona veseni.
Ég fékk gervineglur í gær og þær eru ekkert smá flottar. Svo fer ég í litun og plokkun í dag og svo strípur á morgun og þá er ég bara tilbúin ;).

Jæja helgin búin og maður er bara mættur aftur í vinnuna og þá eru kerfin okkar ekki inni og þá getum við auðvitað ekkert gert. Svo var verið að hringja (klukkan hálfníu) og okkur sagt að líklegast koma kerfin ekkert inn í dag, alveg frábært að hanga fyrir framan tölvuna í 8 tíma og geta ekkert gert.
En helgin var svo góð, við slöppuðum vel af fyrir næstu helgi, þurftum sko alveg á því að halda. Svo fórum við í bíó í gær með Hrönn og Axel, fórum á Crimson River 2. Myndin er mjög góð fyrir utan mjög svo lélegan endi. Það er eins og handritshöfundarnir hafi haft 5 mínútur til að klára endinn, ekki alveg nógu gott sko.
En svo verður mikið að gera í þessari viku, prufuförðun, litun og plokkun, láta setja á sig gervineglur, skreyta salinn, fara í æfingu í kirkjunni, athuga skreytingarnar og margt fleira ;)