Hér er allt á fullu að undirbúa skírnina sem verður núna á laugardaginn. Þ.e.a.s. við erum rosa dugleg að ákveða hvað þarf að gera en svo tekur aðeins lengri tíma að gera hlutinn :). Sem betur fer ætla tengdó að taka Benedikt á föstudagskvöldið svo að við náum að þrífa og svona. Íbúðin lítur nefnilega oftast út eins og eftir sprengjuárás.

Annars hlakka ég ekkert voðalega mikið til veislunnar því að ég er búin að taka allar mjólkurvörur út úr mínu mataræði. Ég má ekki einu sinni borða skinku því að það er mjólkurduft í henni. Þannig að ég má ekki borða neitt sem verður á boðstólum í veislunni nema flatkökur með hangikjöti (með engu smjöri auðvitað). En litlu skottunni virðist líða aðeins betur þannig að þá er þetta þess virði. Hún er samt ennþá að fá í magann þannig að ég er líka búin að taka út egg og glúten. Sem þýðir að ég lifi á ávöxtum og grænmeti þessa dagana, mjög skemmtilegt. Ef hún lagast ekki af þessu þá er ég gjörsamlega lens með hvað getur hjálpað henni, er búin að prófa allt. Er alveg að gefast upp þessa dagana, alveg ömurlegt að horfa á barnið sitt engjast um af magapínu daginn út og daginn inn og alveg sama hvað maður gerir þá virðist ekkert hjálpa nógu mikið.

Jæja, er ekki fínt að blogga meðan að nýjasti fjölskyldumeðlimurinn sefur voða vært framan á mér í Moby Wrapinu? Það er algjör snilld að geta vafið börnin sín þétt að sér og samt verið með báðar hendur lausar, ætti að gefa manni nægan tíma til að ná að klára húsverkin en það er bara mikið skemmtilegra að vera í tölvunni.

Við hjónin fórum á sælkerakvöld í gær með vinnufélögunum hans Árna, mér leið nú eins og ég væri algjör gikkur. Þurfti að spyrja við hvern rétt hvort að það væru mjólkurvörur eða egg í honum en better safe than sorry. Annars hlakkaði smá í mér í gær, einn vinnufélaginn útbjó lambahjörtu en eins og allir vita er það eitt af mínum uppáhaldsréttum. Árna finnst þetta hinsvegar frekar ógeðslegt og mér hefur aldrei tekist það að fá hann til að smakka þetta. Hinsvegar er sú regla á þessum kvöldum að maður verður að smakka allt og viti menn, Árni kláraði skammtinn sinn. Þannig að núna get ég farið að elda hjörtu, lifur og nýru (sem ég hef ekki mátt elda heima í 8 og hálft ár) og Árni getur ekki sagt neitt.

Ég kíkti svo aðeins í búðir í gær og náði að kaupa tvær jólagjafir, finnst það nú vel af sér vikið miðað við að Berglind Elna drekkur á tveggja tíma fresti og þar sem að hún neitar pelanum þá þarf ég að gjöra svo vel að vera heima eða a.m.k. ekki langt í burtu þegar að hún er orðin svöng. Ætla að reyna að klára allar jólagjafirnar næstu 2-3 helgar, nenni ekki að vera að dandalast í Kringluna/Smáralindina í desember þegar að það er mikið skemmtilegra að jólast með fjölskyldunni minni í ró og næði. Fara á kaffihús og fá sér heitt kakó, fara í Jólaþorpið, baka piparkökur, o.s.frv.

Lítið að frétta af okkur, lífið gengur bara sinn vanagang þessa dagana. Berglind Elna er voðalega dugleg að drekka og var orðin 3.850 grömm í seinustu vigtun, er greinilega að flýta sér að stækka. Hún er hinsvegar ekki jafn góð í að sofa á nóttunni og mamman fær lítinn svefn þessa dagana, vonandi fer það nú að lagast. Ef hún ætlar að vera lík bróður sínum þá eru samt ca. 2-3 mánuðir í að ég fái 5-6 tíma samfleyttan svefn.

Mér finnst pínku skrýtið að hugsa til þess að ég fari ekkert aftur að vinna fyrr en í ágúst á næsta ári, ég er rosalega fegin að ætla að vera heima í eitt ár en þetta er voðalega skrýtin tilhugsun.

Annars fórum við með Berglindi í myndatöku á fimmtudaginn, oh ég hlakka svo til að sjá myndirnar næsta miðvikudag. Hún var nú meira vakandi en bróðir sinn (þegar að við fórum með hann í myndatöku á svipuðum aldri) og var nú ekkert alltof sátt við að geta ekki bara sofið, alltaf verið að láta hana í einhverjar stellingar. Eftir myndatökuna fórum við svo á mömmuhitting, alltaf gaman að hitta aðrar mömmur sem eiga börn á svipuðum aldri. Þessir mömmuhittingar verða alltaf á fimmtudögum í vetur, er strax byrjuð að hlakka til næsta :).

Þá erum við búin að finna nafn á litlu prinsessuna. Þar sem að við vissum að það væri von á stelpu vorum við búin að finna nokkur nöfn og eftir að hafa mátað þau við hana völdum við nafnið Berglind Elna. Berglind er út í loftið en Elna er í höfuðið á mömmu. Vorum að hugsa um að opinbera nafnið þegar að hún verður skírð en þar sem skírnin verður líklegast ekki fyrr en í október vildum við nefna hana strax.

Það eru komnar myndir á myndasíðuna hans Benedikts.

Fórum með litlu prinsessuna í 5 daga skoðun í dag. Hún kom voðalega vel út, er búin að ná fæðingarþyngdinni sinni og 50 gr. betur. Hún er reyndar smá gul þannig að við þurfum að vekja hana á ca. 3 tíma fresti en greinilega ekkert sem þarf að hafa áhyggjur af, fyrst að hún er að þyngjast svona vel.

Reyndar heyrði læknirinn smá smelli í öðrum mjaðmaliðnum og hún þarf að fara í ómun einhvern tímann á næstunni. Ef það kemur eðlilega út þá þarf hún samt sem áður að fara í röntgenmyndatöku þegar hún er 6 mánaða. Læknirinn tók nú samt fram að þetta væri líklegast allt í lagi en vildi bara vera viss.

Annars erum við bara að venjast þessu nýja lífi, mér finnst voðalega skrýtið að ná lítið sem ekkert að vera með Benedikt þessa dagana. Við mæðgurnar erum oftast sofandi þegar að feðgarnir vakna á morgnana þannig að ég sé hann eiginlega ekkert fyrr en eftir leikskólann og þá þarf ég auðvitað oft að vera að sinna litlunni líka. Sem betur fer eru þeir feðgar voða nánir og skemmta sér vel en mömmuhjartað er nú samt frekar lítið í sér og ég hlakka til þegar að ég get farið að vera meira með honum.

Svo finnst mér heldur ekkert skemmtilegt að Árni er búinn að sofa inni hjá honum í ca. 2 vikur. Hann er eitthvað óöruggur og ef Árni er ekki inni hjá honum, vaknar hann 3-4 sinnum á nóttu og er ca. hálftíma að sofna aftur og vaknar svo alveg kl. 6 á morgnana. Hinsvegar sefur hann alveg til 7 - 7:30 þegar að Árni er inni hjá honum og hann þarf alveg á því að halda, annars verður hann svo pirraður í leikskólanum. Þannig að ég sef ein í þessu stóra rúmi á nóttunni (reyndar læt ég nú bara litluna sofa hjá mér) en ég hlakka voða mikið til þegar að ég fæ manninn minn aftur :).

Yndislega falleg stelpa leit dagsins ljós í gærmorgun kl. 6:46. Þá voru aðeins liðnir rúmir tveir tímar frá fyrsta verk og foreldrarnir voru einungis búnir að vera hálftíma í Hreiðrinu þegar að hún kom í heiminn. Eins gott að Benedikt var með ömmu sinni og afa í sumarbústaðnum vegna þess að það hefði ekki verið neinn tími að bíða eftir neinum til að líta eftir honum. Þá hefði litla stelpuskottið komið í heiminn annaðhvort heima eða í bílnum. Annars vissum við foreldrarnir að við ættum von á stelpu, við ákváðum semsagt að kíkja í pakkann í 20 vikna sónarnum en sögðum ekki neinum frá :).

Öllum líður vel, mamman og pabbinn eru voðalega stolt og litlan sefur bara og drekkur. Reyndar var nóttin frekar erfið, hún fékk smá í magann og vildi helst bara vera á brjóstinu en þar sem hún er svo dugleg að drekka þá getur maður ekki kvartað. Benedikt kemur svo heim seinna í dag, við hlökkum mjög mikið til að sjá viðbrögðin hans.

Okkur fannst alveg frábært að geta verið í Hreiðrinu, yndislegt andrúmsloft, allir svo rólegir og tilbúnir til að hjálpa. Við vorum þar í 12 tíma en fórum svo heim og erum að njóta þess að kynnast öll betur.

Takk fyrir allar kveðjurnar, þið eruð yndisleg.

Sætasta prinsessan



Pabbinn svo stoltur



Mamman pínku þreytuleg

Það bólar ennþá ekkert á krílinu en miðað við stríðnina í föðurfjölskyldu þess þá er alveg bókað að það vilji koma í heiminn kl. 12:15 á morgun svo að mamman missi nú af handboltaleiknum :). Ef það ákveður að koma í heiminn á morgun þá á það sama afmælisdag og Harpa frænka, á laugardag á Einar frændi afmæli, þann 26. á Fjóla frænka hans Árna afmæli og þann 28. (sem er settur dagur) átti langafi hans Árna afmæli. Nóg af dögum til að velja um.

Ég hef hinsvegar pínku áhyggjur ef ég geng framyfir því að ljósmæður eru búnar að boða til sólarhringsverkfalls 5. -6. september og hvað ef maður fer í gang þá?? Er þá engin ljósmóðir starfandi á fæðingargangi/Hreiðrinu? Þann 11. september er ég svo gengin 42 vikur og þá er maður settur í gang en það er einmitt verkfallsboðun hjá þeim 11. -12. sem myndi líklegast þýða að ég yrði ekki sett í gang fyrr en 15. september, ég neita að bíða það lengi eftir krílinu. Plús það að ég vil nú helst ekki fæða 11. september, ekki neitt voðalega skemmtilegur afmælisdagur fyrir litla krílið. Ég trúi nú samt ekki öðru en að ríkið semji fyrir þann tíma, þetta er svo mikilvæg þjónusta og ljósmæður eiga skilið að menntunin þeirra sé metin að verðleikum.

Annars er ég svo stolt af strákunum okkar, ég horfði á seinni hálfleikinn á móti Póllandi meðan að strákarnir mínir sváfu og það var frekar erfitt að mega ekki öskra og láta öllum illum látum. En þar sem að ég verð ein heima á morgun þá get ég hagað mér alveg eins og ég vil ;).

Jæja, ætla að fara að horfa á Grey´s, búin að horfa á 10 seríur af ER, 4 seríur af Friends og er núna byrjuð á Grey´s. Lífið mitt er mjög svo spennandi þessa dagana.

Komin 38 vikur og 1 dag. Væri nú alveg til í að litla krílið myndi láta sjá sig mjög fljótlega, er orðin frekar þreytt á þessum fyrirvaraverkjum sem halda fyrir mér vöku næstum hverja nótt. En sem betur fer er ég hætt að vinna þannig að ég get hvílt mig vel á daginn.

Við hjónin áttum fjögurra ára brúðkaupsafmæli seinasta fimmtudag og fórum út að borða á Argentínu í tilefni dagsins. Um að gera að nýta tímann og fá pössun fyrir einungis eitt barn :). Nammi namm, hvað maturinn var góður. Rúsínan í pylsuendanum var auðvitað súkkulaðikakan þeirra, þvílíkt hnossgæti.

Annars er voðalega lítið að frétta, ég er mestmegnis heima þessa dagana, Árni er að vinna og Benedikt er auðvitað í leikskólanum. Þannig að allir að senda góða hríðar- og fæðingarstrauma til mín :).

Ég var útskrifuð af sjúkrahúsinu á föstudaginn, mjög ánægð með það. Ekki það að starfsfólkið á meðgöngudeildinni sé ekki yndislegt en heima er best. Núna eru bara 3 dagar í að krílið flokkist ekki sem fyrirburi þannig að ég er ekkert neitt voðalega róleg hérna heima. Árni vill helst að ég liggi uppi í rúmi og hreyfi mig ekki neitt en ég er komin á fulla ferð, þ.e.a.s. hreyfi mig eins mikið eins og bumban leyfir. Ég er nú samt dugleg að setjast niður og hvíla mig enda finnst mér ég verða þreytt við minnsta verk. En það er allt tilbúið fyrir litla krílið þannig að það má alveg fara að koma. Reyndar verður verst ef það kemur frá 6. ágúst - 12. ágúst því að þá er Benedikt í aðlögun á leikskólanum en það reddast nú örugglega einhvern veginn. Ætli það sé ekki týpískt að það komi þá :).

Kannski kominn tími á að uppfæra lesendur aðeins. Er búin að fara 4 sinnum upp á deild vegna verkja, í seinasta skipti í gær. Þá var ég aðeins byrjuð í fæðingarferlinu en því miður þá blæddi dálítið mikið og ég var lögð inn vegna þess að læknarnir höfðu áhyggjur að það væri að blæða frá fylgjunni og að ástæðan fyrir því að ég væri komin af stað væri einhvers konar sýking í leginu. Sem betur fer komu allar prufur vel út og ekkert bendir til sýkingar en ég þarf að vera í eftirliti í sólarhring í viðbót. Ég er nú allavega búin að halda þessu kríli inni lengur en ég náði að ganga með Benedikt þannig að þetta er allt á réttri leið. Eftir viku verður maður svo ekki lengur flokkaður sem fyrirburi þannig að vonandi næ ég að halda því inni svo lengi. Það er sem betur fer hætt að blæða en ef það byrjar aftur að blæða verð ég líklegast sett af stað. Verkirnir eru líka dottnir niður, þannig að allt lofar góðu. Ég leyfi ykkur svo að fylgjast með :).

Ekki skil ég íslensk stjórnvöld þessa stundina. Að reka mann sem er að sækja um pólitískt hæli úr landi einn, tveir og þrír án þess að vera búin að fara yfir umsókn hans. Konan hans fæddi fyrir 6 vikum, maðurinn var eina fyrirvinnan á heimilinu og með þessu er verið að stía fjölskyldunni í sundur. Ég fékk tár í augun þegar að ég sá litla barnið í fréttunum á Stöð 2, finnst þetta alveg hræðilegt. Þetta er til háborinnar skammar fyrir íslensku þjóðina.

Við fjölskyldan fórum í myndatöku í dag, þ.e.a.s. þetta var eiginlega mest bumbumyndataka en Árni og Benedikt voru á nokkrum myndum líka. Hlakka endalaust mikið til að sjá myndirnar, vona að þær komi vel út. Svo förum við aftur þegar að krílið verður 2-3 vikna, eigum tíma í byrjun september, eins gott að ég gangi ekki mikið framyfir :).

Annars hitti ég fæðingalækni í seinustu viku og hún sagði að þótt að það væru örlítið meiri líkur á að ég myndi eiga aftur fyrir tímann þá gæti alveg eins verið að ég myndi ganga fulla meðgöngu núna. Við erum í raun bara að bíða eftir 7. ágúst því að þann dag flokkast krílið ekki lengur sem fyrirburi en svo er auðvitað týpískt að ég gangi jafnvel framyfir. Mér líður alveg svakalega vel þessa dagana, mér finnst ég reyndar líta út eins og hvalur en það munar rosalega miklu að geta farið heim um hádegi og hvílt sig. Árni er líka svo frábærlega æðislegur við mig, rekur mig inn í rúm að leggja mig ef honum finnst ég vera þreytuleg og sér eiginlega um allt á heimilinu. Alveg yndislegur við ófrísku eiginkonuna sína.

Fyrir utan þetta er mest lítið að frétta, bara 13 vinnudagar eftir hjá mér og þá förum við í sumarbústað í viku, hlakka endalaust til.

Leikurinn í gær var svo spennandi, við stóðum meirihlutann af síðustu mínútunum og héldum í vonina að þeir myndu ná að vinna með meira en 8 marka mun. En því miður heppnaðist það ekki en strákarnir okkar stóðu sig alveg svakalega vel. Hlakka til að sjá þá á ÓL í ágúst, reyndar frekar erfiður riðill sem við erum í en við eigum nú alveg að geta komist upp úr honum :).

Annars er nú mest lítið að frétta, fórum í Fjölskyldu- og Húsadýragarðinn um helgina og Benedikt fannst það ekkert smá skemmtilegt. Greinilegt að hann er líkur foreldrum sínum :) sem dýrka að fara í dýragarða. Árni var líka voðalegur duglegur að reka mig inn í rúm þegar að honum fannst kominn tími á að ég myndi hvíla mig. Finn það alveg að ég þarf að hvíla mig meira þessa dagana og það er voðalega þægilegt að geta lagst upp í rúm í smátíma og safna smá kröftum. Enda er ég eiginlega ekkert búin að finna meira fyrir þessum verkjum þannig að ég er að gera eitthvað rétt.

Svo eru bara 5 vinnuvikur eftir og þá erum við fjölskyldan komin í sumarfrí, það verður rosalega næs. Fyrsta skiptið sem við tökum svona langt sumarfrí saman.

Jæja, þá er búið að skikka mig í 50% vinnu í viku. Ég var byrjuð að fá svo mikla samdrætti með verkjum í seinustu viku að ljósan mín ráðlagði mér að prófa að minnka við mig vinnuna og athuga hvort að þessir samdrættir myndu ekki hverfa. Árni var svo yndislegur að taka Benedikt í sumarbústaðinn til tengdó á laugardaginn þannig að ég var bara ein heima allan daginn og lá uppi í rúmi að horfa á ER. Alveg frábær hugmynd að hafa keypt þessa þætti þegar að ég þarf að hvíla mig svona mikið. Árni kom svo heim seinnipart laugardags og við fórum í matarboð, vorum nú ekki lengi því að Árni fór aftur í sumarbústaðinn á sunnudag og ég var bara aftur skilin eftir heima :). Þeir feðgar komu svo heim seint um kvöldið.

Ég reyndi að horfa á Ísland-Makedónía en hætti í hálfleik, hafði einhvern veginn ekki taugar í að horfa á hann allan. Maður bíður bara spenntur eftir 15. júní, vonandi náum við að vinna þá með meira en 8 marka mun svo að við komumst áfram. Þó að ég eigi að slappa af þá ætla ég samt að fara á leikinn, hvíli mig bara vel á undan og á eftir. Get nú samt vel ímyndað mér að leikurinn verði mjög taugatrekkjandi.

Alveg æðislegt veður í dag, vona að við fáum nú nokkra svona sumardaga í sumar. Er m.a.s. búin að fjárfesta í tvennum óléttukvartbuxum svo að ég kafni nú ekki úr hita.

Annars er ég voðalega stolt af strákunum okkar, alveg frábær leikur hjá þeim á sunnudaginn og ekki spillir fyrir að vinna Svíana og koma í veg fyrir að þeir komist á stórmót (again!!). Við hjónin erum einmitt búin að kaupa miða á Ísland-Makedónía þann 15. júní. Hlakka svo mikið til að fara þangað og horfa á þá spila. Svo held ég að Ólympíuleikarnir byrji þann 8. ágúst og þá verð ég í fríi þannig að ég get legið uppi í sófa og horft á leikana allan daginn eða þ.e.a.s. þangað til að ég þarf að sækja Benedikt til dagmömmunnar :).

Ég fór í sykurþolspróf í dag, hef nú alveg drukkið betri drykki en sem betur fer hélt ég honum niðri. Niðurstöðurnar voru fínar við fyrstu sýn en ég fæ nákvæmari niðurstöður á fimmtudaginn þegar að ég fer til ljósunnar. En sú sem var að taka blóðið sagði að þetta væru bara frábærar tölur :). Mjög ánægð að heyra það.
Hinsvegar tekur þetta alveg svakalega langan tíma, þær taka nefnilega blóðprufu á hálftíma fresti í 2 tíma. Það var búið að segja við mig að ég fengi stofu til að vera í en það var engin stofa laus í morgun þannig að ég sat allan tímann í biðstofunni, voða gaman. Var nú samt það snjöll að hafa með mér fartölvuna og horfði á ER allan tímann. Vorum nefnilega að panta okkur 10 fyrstu seríurnar, ótrúlega gaman að horfa á þetta aftur.

Við skelltum okkur á Indiana Jones í gær og hún hefði alveg mátt vera betri. Fyrri hlutinn var reyndar mjög trúr gömlu myndunum en svo fór allt út og suður í seinni helmingnum.

Ég var líka svo ósátt við að það var sýnt úr Sex and the city myndinni og ég get liggur við sleppt því að fara á hana núna. Kannski ekki alveg en ég þoli ekki þegar að það er sýnt eiginlega allt það helsta sem gerist í myndinni. En við stelpurnar erum einmitt að fara á hana næsta miðvikudag, hlakka samt mikið til að fara :).

Á morgun eiga Jósa og Danni svo afmæli, sniðugt þegar að makinn á sama afmælisdag þá gleymir maður honum ekki. Þau ætla að halda heljarinnar veislu og Benedikt fer í næturpössun til tengdó, hlakka til að sofa smá út.

Annars misstum við af helstu fréttunum í gær, ég og Árni vorum að keyra þegar að skjálftinn varð og fundum ekki fyrir neinu. Vissum ekki einu sinni að það hefði orðið skjálfti fyrr en mamma hringdi til að spyrja hvort að við hefðum fundið fyrir honum. En sem betur fer skemmdist ekkert hjá tengdó og mikil mildi að enginn meiddist alvarlega.

Miðað við þessi fáu lög sem ég hef heyrt þá ætla ég að spá því að Serbía vinni aftur, finnst lagið þeirra rosalega heillandi. Auðvitað vonar maður að Ísland vinni en ég tel einhvern veginn ekki miklar líkur á því. Samt held ég að við verðum í efstu 10 sætunum. Hinsvegar verð ég alveg hoppandi brjáluð ef Svíþjóð vinnur, finnst lagið alveg óþolandi og það er ekki hægt að horfa á manneskjuna því að hún er svo geimveruleg.

Eurovision í kvöld, hlakka svo til að sjá hvernig Eurobandið stendur sig og líka hvort að við komumst í aðalkeppnina. Maður verður nú að hugsa jákvætt. Karen og Grétar ætluðu að koma til okkar í kvöld en svo kemur Karen bara ein því að Grétar ákvað að taka eitthvað ljósmyndanámskeið framyfir okkur, alveg óskiljanlegt :). Ætlum að gera heimagerða pizzu og hafa eitthvað nammigott í eftirrétt.

Fylgdist með keppninni á þriðjudaginn með öðru. Eitthvað hefur áhuginn minnkað á þessu hjá mér, hefði örugglega áður fyrr horft mjög stíft á keppnina og oftast hef ég kunnað flest lögin utanað um þetta leyti en ekki núna. Er alveg búin að heyra eitt og eitt lag en ekkert í líkingu við áður. Hef vanalega verið búin að mynda mér skoðun á því hver sigrar en þar sem að ég hef heyrt svo fá lög þá ætla ég ekkert að fara út í þá sálma. Hinsvegar held ég að Árni sé mjög ánægður með að hin ýmsu Eurovisionlög hljóma ekki mikið á heimilinu núna, nema auðvitað íslenska framlagið.

Annars er ég komin akkúrat 26 vikur í dag, þetta styttist óðfluga enda stækkar bumban og stækkar. Verður alltaf erfiðara að snúa sér á nóttunni, tekur alveg 5 mínútur að snúa sér, koma púðanum aftur fyrir á milli lappanna og koma sér þægilega fyrir. Örugglega mjög fyndið að fylgjast með manni.

Ég þoli ekki hvað matarmál manns verða allra mál þegar að maður er óléttur. Samstarfsfélagar mínir eru mjög duglegir að láta mig vita þegar að ég er ekki að borða nógu hollt að þeirra mati. Ef ég t.d. kaupi mér nammi þá fæ ég að heyra að ég ætti nú helst ekki að vera að borða svona. Í morgun var föstudagskaffi og það er vanalega franskbrauð/heilhveitibrauð en í morgun var ekkert þannig, bara rosalega gróft brauð og ég kem því hreinlega ekki niður. Hef aldrei getað það, bara frá því að ég man eftir mér. Ég segi: Hva, ekkert franskbrauð/heilhveitibrauð í dag og þá er bara sagt á móti: Þetta er mikið hollara fyrir þig, þegiðu bara og borðaðu. Oh, það sauð á mér, ég var svo reið enda lét ég heyra í mig en enginn virtist taka mark á mér. Allir hafa örugglega hugsað að þetta væru bara hormónarnir. Ég á hinsvegar föstudagskaffið næst og ég er alvarlega að spá í að kaupa bara franskbrauð og sjá hvað allir segja þá. Ég var hinsvegar svo reið og sár í morgun að ég bað um frí það sem eftir var dagsins og var heima að slappa af.