Bara nóg að gerast þessa dagana. Árni tók þá ákvörðun að fresta ritgerðarskilum, gengur ekki alveg nógu vel hjá honum þannig að hann byrjar að vinna 1. ágúst í stað 1. september. Hann miðar svo við að skila einhvern tímann um áramótin. Þótt að það sé pínku hættulegt að byrja að vinna áður en maður skilar þá er það nú talsvert betra en að sitja fyrir framan tölvuna og ná engu niður á blað. En honum líður allavega mikið betur núna og seinasti mánuðurinn af sumrinu verður líklegast aðeins fjörmeiri vegna þess að hann þarf ekki að vera allar helgar uppí skóla að læra.
Við fórum svo í heimsókn til Hildar og Konna í gær. Ekkert smá æðislegt að sjá þau, erum búin að sakna þeirra alveg svakalega mikið.
Á fimmtudaginn ætlum við svo að fara í smá útilegu. Ætlum að gista í Skaftafelli þá nótt og keyra til Bergþórs pabba á Bakkafirði á föstudag. Á laugardaginn ætlum við að keyra á Kárahnjúka, mig langar að sjá alla náttúruna sem fer undir vatn en Árni er nú reyndar spenntari fyrir því að sjá stífluna sjálfa. Á sunnudaginn leggjum við aftur af stað frá Bakkafirði og planið er að skoða Kröflu og Víti. Við ætlum svo að koma við í Búðardal til að hitta Hildi og Konna aftur en við náum líklegast ekkert að hitta þau meira meðan þau verða á landinu. En allavega, skemmtileg helgi framundan.
þriðjudagur, júlí 25, 2006
Birt af Inga Elínborg kl. 7/25/2006 01:57:00 e.h. |
föstudagur, júlí 21, 2006
Ég er búin að vera að fylgjast með Rockstar: Supernova, örugglega eins og flestir Íslendingar og ég er svo stolt af Magna. Hann syngur auðvitað frábærlega vel, kemur mjög vel fyrir og er alveg laus við allan hroka. Íslendingahjartað mitt tók svo stóran kipp þegar að ég sá að hann er sigursælastur í netkosningu um hver sigrar í keppninni. Er greinilega vinsæll hjá fleiri en Íslendingum.
Birt af Inga Elínborg kl. 7/21/2006 08:09:00 f.h. |
þriðjudagur, júlí 18, 2006
Sigga systir á afmæli í dag, innilega til hamingju með afmælið elsku Sigga mín. Njóttu dagsins :).
Voðalega mikill mánudagur í mér, bæði í gær og í dag. Var ekki að nenna að mæta í vinnuna í morgun en maður lét sig nú hafa það.
Er byrjuð að telja niður í flutningana, bara 45 dagar þangað til að við fáum afhent sem þýðir að það eru einungis 48 dagar þangað til að við getum tekið Snúddsa strák til okkar, hlakka endalaust mikið til að geta knúsað hann daginn út og daginn inn.
Birt af Inga Elínborg kl. 7/18/2006 09:39:00 f.h. |
mánudagur, júlí 17, 2006
Helgin var bara hin fínasta. Það var ættarmót hjá Árna og þar sem að veðrið var svo leiðinlegt ákváðum við að fara bara snemma á laugardagsmorgninum og aftur heim um kvöldið. Mótið heppnaðist bara mjög vel þrátt fyrir veðrið enda var mjög gott að geta farið inn í félagsheimilið þegar að rigningin var of mikil.
Sunnudagurinn fór nú bara í leti, sváfum til hádegis og Árni fór svo upp í skóla að læra meðan að ég horfði á nokkra þætti og naut þess að hafa ekkert að gera. Er alveg að njóta þess að vera í fríi um helgar, reyndar væri nú betra að Árni væri með í fríi með mér en það gerist nú vonandi fljótlega. Allir að senda ritgerðarstrauma til hans, styttist alltaf í skil hjá honum og þ.a.l. styttist líka í að við fáum Snúðinn okkar aftur, afhendingu á íbúðinni og að Árni byrji í vinnunni sinni.
Birt af Inga Elínborg kl. 7/17/2006 10:38:00 f.h. |
miðvikudagur, júlí 12, 2006
Jarðarförin hennar ömmu var á mánudaginn. Margar minningar hafa rifjast upp undanfarna daga. T.d. það að ég hefði líklegast aldrei lært að lesa nema með hennar hjálp enda var ég oft hjá henni þegar að ég var yngri, sat á stofugólfinu við bókaskápinn og las bækurnar hennar. Ég hef líklegast líka erft stundvísina frá henni en hún var alltaf tilbúin hálftíma áður en hún átti að leggja af stað, var m.a.s. komin stundum út á gangstétt og beið eftir þeim sem var að sækja hana korteri áður en von var á þeim. Amma var ein af viljasterkustu og þrjóskustu konum sem ég hef þekkt en alltaf jafn yndisleg þrátt fyrir það. Takk fyrir allt elsku amma.
Við systkinin ákváðum að setja ljóð í Morgunblaðið til minningar um hana og er það hér fyrir neðan.
Með þessu ljóði kveðjum við elsku ömmu.
Guð blessi minningu hennar.
Við kistu þína kveðjumst við í dag,
í kirkju hljómar ómþýtt sorgarlag.
Þú leggur upp í langa gönguför,
þín leið er greið að drottins fótaskör.
Við höfum ótal margt að þakka þér,
þakklátt auga minninganna sér
myndir koma minn á hugarskjá,
já, margt er gott sem hugarfylgsnið á.
(Hörður Zóphaníasson.)
Þín barnabörn
Matthías, Sólveig, Sigríður Elín, Bjarklind og Inga Elínborg.
Birt af Inga Elínborg kl. 7/12/2006 07:04:00 e.h. |
laugardagur, júlí 08, 2006
Hildur vinkona á afmæli í dag. Innilega til hamingju með afmælið elsku Hildur og láttu Konna stjana við þig í allan dag :). Hlökkum ótrúlega mikið til að sjá ykkur þegar að þið komið til Íslands.
Við erum svo á leiðinni í afmæli í dag. Ríkey, litla frænka, varð semsagt eins árs í gær. Til hamingju með daginn Ríkey mín.
Fyrir utan þetta er nú mest lítið að frétta, ég geri ekki neitt annað en að vinna og Árni er á fullu í ritgerðinni. Vá, hvað ég hlakka til þegar að hann verður búinn og ég sé hann meira en klukkutíma á dag :). Njótið helgarinnar allir saman og verið góð hvort við annað.
Birt af Inga Elínborg kl. 7/08/2006 10:17:00 f.h. |
þriðjudagur, júlí 04, 2006
Skrýtnar tilfinningar í gangi þessa dagana. Á sunnudeginum fékk ég þær fréttir að ég væri búin með kandídatsnámið mitt!! Fékk semsagt 10 fyrir lokaritgerðina, er voða stolt af sjálfri mér :). Hinsvegar fannst mér mjög svo skrýtið að vera ánægð með þetta, finnst það einhvern veginn ekki við hæfi þessa dagana. Vonandi get ég fagnað þessu betur þegar í næstu viku þegar að við verðum búin að kveðja ömmu.
Finnst þetta dálítið óraunverulegt, maður er búin að vera í námi samfleytt seinustu 5 ár og allt í einu er þetta öryggisteppi tekið frá manni. Núna er maður orðin stór og þarf að fara að leita sér að framtíðarvinnu, ótrúlega skemmtilegt en samt yfirþyrmandi á einhvern hátt.
Birt af Inga Elínborg kl. 7/04/2006 08:15:00 f.h. |
sunnudagur, júlí 02, 2006
Dagurinn í gær var yndislegur. Helgan mín var svo falleg í kjólnum sínum, Freyr svaka myndarlegur í jakkafötunum og Hlynur auðvitað algjör dúlla í skírnarkjólnum. Ótrúlega falleg athöfn enda var ég með tárin í augunum mestallan tímann og gat varla sungið sálmana.
Veislan var mjög skemmtileg, góður matur og fullt af ræðum. Ég og Ásta héldum einmitt ræðu sem heppnaðist bara mjög vel :). Eftir veisluna hittumst ég, Karen, Sara og Rannveig heima hjá Söru, tókum eitt Buzz spil og spjölluðum. Mjög skemmtilegur dagur í alla staði.
Hinsvegar er oft stutt á milli hláturs og gráturs. Mamma hringdi í mig í morgun vegna þess að elsku amma mín lést í nótt. Hún var búin að vera svo mikið veik alla vikuna, í hálfgerðu móki og virtist ekkert vita af neinum í kringum sig. Þegar að ég fór til hennar í vikunni hélt hún nú samt í hendina á mér og vildi alls ekki sleppa. En minningarnar um hana lifa ennþá og það er alltaf gott að hugsa til þeirra. Hún er allavega komin til afa núna og líður mun betur.
Birt af Inga Elínborg kl. 7/02/2006 09:52:00 f.h. |
föstudagur, júní 30, 2006
Það tekur á taugarnar að bíða eftir einkunninni sinni. Censureringen var í morgun kl. 10 þar sem að leiðbeinandinn minn og censorinn hittust og ræddu rigerðina og hvaða einkunn ég ætti að fá. Ég hefði reyndar líka átt að vera stödd þar en þar sem að ég er nú flutt til Íslands þá var ekkert mál að fá undanþágu.
En ég er semsagt búin að vera á iði í allan dag. Er að bíða eftir því að þetta komi inn á einkunnasíðuna mína (sem ég tel nú ekki miklar líkur á, svona alveg strax) eða þá að Mogens sendi mér hvað ég fékk. Hann var búinn að segjast ætla að gera það, vona bara að hann hafi ekki gleymt því.
Birt af Inga Elínborg kl. 6/30/2006 02:02:00 e.h. |
miðvikudagur, júní 28, 2006
Við fórum og kíktum á íbúðina okkar í gær. Oh hún er svo flott, foreldrar okkar komu með og voru jafnhrifin af henni og við. Hlakka ekkert smá til að fá hana afhenta.
Ég fór svo í heimsókn til Ingibjargar og Bigga í gær til að kíkja á litla nýfædda prinsinn. Ekkert smá sætur og ótrúlega góður, sofnaði m.a.s. í fanginu á mér.
En fyrir utan þetta er nú mest lítið að frétta, ég geri voðalega lítið þessa dagana. Árni er alla daga uppi í skóla að skrifa og ég er á fullu að sauma jólaútsauminn minn :).
Birt af Inga Elínborg kl. 6/28/2006 08:14:00 f.h. |
föstudagur, júní 23, 2006
Oh hvað ég er ánægð að það skuli vera að koma helgi og að ég geti sofið út næstu tvo daga. Ég er alveg að deyja úr þreytu þessa dagana, búin að fara tvisvar á flugvöllinn í vikunni. Sóttum tengdó á þriðjudagsnótt og svo sótti ég mömmu og pabba í morgun.
En annars hlakka ég bara nokkuð mikið til helgarinnar þó að ég verði ein heima báða dagana. Ég keypti mér jólaútsaum í vikunni, ætla að byrja að sauma hann. Svo bíða mín nokkrir þættir og ein mynd til að horfa á. Planið er semsagt að liggja uppi í rúmi og hvíla sig sem mest :).
Næsta helgi verður hinsvegar fjörmeiri, Helgan mín og Freyr ætla að gifta sig og skíra litla prinsinn 1. júlí. Hlakka rosalega mikið til, sérstaklega að sjá hana í kjólnum, hún verður svo sæt.
Birt af Inga Elínborg kl. 6/23/2006 09:46:00 f.h. |
laugardagur, júní 17, 2006
Hæ hó jibbí jei og jibbí jei, það er kominn 17. júní :). Ótrúlega skemmtilegur þjóðhátíðardagur, Bjarklind systir á 35 ára afmæli í dag. Innilega til hamingju með afmælið elsku Bjarklind mín.
Við erum svo komin áfram á HM!!! Lögðum Svíagrýluna að velli, þeir komast ekki á HM í fyrsta skipti í sögu mótsins. Maður var nú með í maganum nokkrum sinnum, t.d. þegar að það voru bara 3 Íslendingar á vellinum á móti 5 Svíum. Ótrúlega skemmtilegur leikur og strákarnir okkar eru langbestir :).
Heyrði í Hildi og Jósu í gær. Þær voru á sommerfesti í skólanum og hringdu þegar að uppáhaldslagið mitt heyrðist, bara til að leyfa mér að heyra það :). Fékk smá saknaðartilfinningu, langaði til að vera í Aarhus með vinunum þar, spjalla saman og djamma. Aldrei að vita nema ég skelli mér með Árna í október þegar að hann þarf að verja ritgerðina sína.
Birt af Inga Elínborg kl. 6/17/2006 06:55:00 e.h. |
fimmtudagur, júní 15, 2006
Ennþá fleiri börn að fæðast í kringum okkur. Gleymdi að segja í gær að litli prinsinn þeirra Ingibjargar og Bigga fæddist þann 10. júní, 16 merkur og 52 cm. Elsku Ingibjörg og Biggi, innilega til hamingju með litla gaurinn. Hlökkum til að sjá ykkur öll.
Birt af Inga Elínborg kl. 6/15/2006 08:39:00 f.h. |
miðvikudagur, júní 14, 2006
Þá erum við komin aftur frá Mallorca. Fórum m.a. í Go Kart, vatnsrennibrautargarð, Marineland, lágum í leti, spiluðum, borðuðum og drukkum. Voða næs en ég var samt rosa ánægð að sofa aftur í mínu eigin rúmi í nótt með hæfilegan kulda í herberginu. Reyndar svaf ég nú bara ca. 2 tíma því að við lentum ekki fyrr en um þrjú og ég var ekki sofnuð fyrr en fimm. Ég var því frekar þreytt í morgun þegar að ég fór í vinnuna. Reyndar er mjög fínt að byrja vinnuvikuna á miðvikudegi, bara tveir vinnudagar eftir :).
Er nú mest bara að bíða eftir einkunninni minni en ég fæ hana líklegast ekki fyrr en í lok mánaðarins. Árni er á fullu að skrifa sína ritgerð, hlakka voða mikið til þegar að hann verður búinn og kvöldin þurfa ekki að fara í ritgerðarskrif.
Birt af Inga Elínborg kl. 6/14/2006 03:44:00 e.h. |
mánudagur, júní 05, 2006
Við vinkonurnar gæsuðum Helgu á laugadaginn og það heppnaðist þvílíkt vel. Fórum með hana í magadans hjá Josy í Magadanshúsinu, klæddum hana svo upp sem Sandy úr Grease og létum hana syngja You're the one that I want í beinni á FM, hún fór í viðtal hjá köllunum á X-inu og létum hana gera sig að fífli niður í bæ. Keyrðum svo í Bláa Lónið þar sem að hún fékk nudd og enduðum svo kvöldið í heimahúsi. Frábær dagur í alla staði.
En svo er það Mallorca á morgun. Verður næs að liggja við sundlaugarbakkann undir sólhlíf með skemmtilegar bækur og krossgátur. Heyrumst í næstu viku þegar að ég kem heim. Adios :).
Birt af Inga Elínborg kl. 6/05/2006 08:22:00 e.h. |
miðvikudagur, maí 31, 2006
Jósa vinkona á afmæli í dag, innilega til hamingju með afmælið Jósa mín. Njóttu dagsins.
Við skötuhjúin skelltum okkur á þriðju X- men myndina í gær, skemmtum okkur mjög vel enda frábær mynd. Vorum að fagna kaupsamningnum á Ölduslóðinni en við skrifuðum undir hann í gær.
Annars er allt á fullu við að leggja lokahönd á gæsunina hennar Helgu. Oh þetta á eftir að vera svo gaman :).
Birt af Inga Elínborg kl. 5/31/2006 03:19:00 e.h. |
sunnudagur, maí 28, 2006
Ég og mamma fórum og kíktum á nýfædda prinsinn í dag. Algjört krútt og alveg eins og pabbi sinn :). Fengum að vita að hann hefði verið 57 cm. en samt tók maður ekkert eftir því að hann væri svona stór og þungur, samsvarar sér mjög vel.
Birt af Inga Elínborg kl. 5/28/2006 11:23:00 e.h. |
laugardagur, maí 27, 2006
Þá er 9. systkinabarnið mitt komið í heiminn. Matti og Þórdís eignuðust semsagt strák kl. 7.38 í morgun, 18 merkur en lengdin var ekki komin á hreint. Innilega til hamingju elsku Matti og Þórdís, hlökkum endalaust mikið til að sjá "litla" gaurinn :).
Svo á Hrönn vinkona afmæli í dag, innilega til hamingju með afmælið elsku Hrönn.
Annars er nú mest lítið að frétta af mér þessa dagana, held að ég sé ennþá í hálfgerðu spennufalli. Vonandi njótið þið helgarinnar, ég ætla allavega að liggja uppi í rúmi og lesa þjóðsögur Jóns Árnasonar í allan dag, get varla hugsað mér betri letidag.
Ætla ekki einu sinni að fara að kjósa enda er ég ekkert inní kosningamálum hérna í Kópavogi. Er eiginlega bara búin að fylgjast með flokkunum í Reykjavík og er alveg ákveðin hvaða flokk ég myndi kjósa ef ég ætti heima þar. En þar sem að ég á ekki heima í Reykjavík og er að flytja úr Kópavogi eftir 3 mánuði þá ætla ég bara að vera heima.
Birt af Inga Elínborg kl. 5/27/2006 11:16:00 f.h. |
fimmtudagur, maí 25, 2006
Ég er búin að skila!!! Ákvað bara að skella ritgerðinni strax í póst eftir að ég var búin að prenta hana, vildi ekki taka áhættuna á því að vera að lesa hana yfir (einn einu sinni) og sjá einhverja villu. Ég er samt ekki búin að ná því að þetta sé búið. Það var samt ekkert smá gaman að sjá ritgerð sem maður hefur unnið að seinustu 5 mánuði allt í einu tilbúna, 4 eintök af 120 bls.
Við fórum svo í þrítugsafmæli til Nonna Quest í gær, ótrúlega skemmtilegt afmæli. Þemað var "goth" og ca. helmingurinn í afmælinu var alveg að standa sig í því, með svartmálaðar varir + neglur, hvítir í andliti með svart í kringum augun og svo má ekki gleyma fötunum. Reyndar var vinahópurinn hans Árna minnst að pæla í þessu, mættum eiginlega bara öll í svörtu en ekkert skrýtilega máluð. En þetta var þvílíkt gaman, kíktum svo einn hring á Glaum en svo fór ég bara heim enda hafði ég vaknað kl. 5 um morguninn :).
Svo er bara allt að gerast, við erum búin að kaupa okkur íbúð!! Erum semsagt á leiðinni í Hafnarfjörðinn, keyptum á Ölduslóð. Ótrúlega flott íbúð, er t.d. með sólpalli þannig að það verður gaman að grilla. Við féllum bara fyrir henni um leið og við sáum hana, Árna fannst meira að segja ekkert mál að hún væri í Hafnarfirði. Finnst pínku skrýtið að við höfum keypt þar því að Árni var alltaf búinn að segja að hann vildi sko ekki eiga heima þar. Fáum hana afhenta 1. september. Mjög svo skemmtileg dagsetning fyrir Árna, hann á að skila ritgerðinni þann dag, byrja hjá Íslenskri erfðagreiningu og við fáum íbúðina. Það sem er ennþá betra er að við getum tekið Snúðinn okkar aftur til okkar ca. viku eftir afhendingu, hlakka endalaust mikið til að fá hann.
En ætla að halda áfram að njóta þess að vera í fríi fram á mánudag en þá byrja ég hjá Landsbankanum í sumarvinnu. Þarf einmitt að vera dugleg að sækja um framtíðarvinnu í sumar. Vona bara að það gangi vel :).
Birt af Inga Elínborg kl. 5/25/2006 12:02:00 e.h. |
mánudagur, maí 22, 2006
Ég og Árni fórum á Da Vinci lykilinn í gær ásamt Hrönn og Axel. Mjög góð mynd, leikararnir eru alveg að gera góða hluti en mér fannst samt sem áður myndin ekki ná "andanum" í bókinni alveg. En mæli samt með henni. Sáum sýnt úr X-Men: The last stand, vá hvað ég hlakka til að sjá hana. Er örugglega geðveik.
Annars held ég að ritgerðin sé búin. Trúi því nú samt varla, Mogens er búin að lesa yfir hana og ég er búin að leiðrétta það sem hann vildi en einhvern veginn líður mér ekki eins og hún sé búin. Er alltaf að renna aftur og aftur yfir hana og athuga hvort að ég sé nú ekki að gleyma neinu. Held að maður geti "betrumbætt" þessa ritgerð endalaust þannig að ég er nokkurn veginn ákveðin í að fara með hana í prentun á miðvikudaginn. Passar líka mjög vel því að það er þrítugsafmæli hjá vini hans Árna á miðvikudagskvöldið. Verður gaman að vera búin að prenta ritgerðina út og þurfa ekkert að hugsa um hana. Planið er svo að liggja í algjörri leti á fimmtudaginn en svo ætla ég að senda hana á föstudaginn.
Birt af Inga Elínborg kl. 5/22/2006 04:27:00 e.h. |